Tíðindini úr Ukraina í morgun siga, at tað eru harðir bardagar í miðbýnum í Bakhmut har eysturi í Ukraina.
Hetta verður sambært tíðindastovuni NTB váttað frá báðum pørtum í krígnum.
Bardagin um býin, sum seinastu tíðina hevur verið miðdepilin í krígnum, er hin longsti og blóðugasti higartil.
- Hermenn hjá Wagner-herliðunum taka seg fram á øllum mótum og royna at bróta ígjøgnum okkara verjuskansar fyri at sleppa inn í miðbýin.
Hernaðarleiðslan í Ukraina sigur í morgun, at tey hava elvt russisku herdeildunum, sum royna at taka Bakhmut, stór tap.
Wagner-deildirnar eru privatir russiskir leiguhermenn, sum berjast á russiskari síðu í krígnum, og teir siga, at teirra herdeildir nú nærkast miðbýnum.
- Vit stríðast fyri hvørjum metri so hvørt, vit nærkast miðbýnum í Bakhmut, siga Wagner-herdeildirnar sambært NTB í morgun.
