Á middegi var lutakast til EM-undankappingina hjá kvinnum í fótbólti.
Undankappingin er býtt upp eftir styrki – at líkna saman við Nations League kappingina. Føroyar eru í triðju deild av trimum.
Føroyar komu í bólk C3, og mótstøðuliðini verða Grikkaland, Montenegro og Andorra.
Føroyar vóru í undankappingarbólki saman við Montenegro í farnu kapping og taptu báðar dystirnar.
Dystirnir í EM-undankappingini verða spældir í apríl, juni og juli. Liðini spæla tvær ferðir ímóti hvørjum øðrum; úti og heima. Samanlagt skulu Føroyar tí spæla seks EM-dystir næstu mánaðirnar.
