Yvir 100 palestinar – ella neyvar 109 – eru deyð í Gaza, eftir at vápnahvíldin í dag varð brotin.
Tað upplýsir Hamas-stýrda heilsumálaráðið sambært tíðindastovuni AFP nú seinnapartin.
Ashraf al-Qudra sigur,at »hundraðtals« eru særd.
Deyðstølini eru ikki váttað av uttanveltaðum.
Eftir sjey dagar við vápnahvíld í Gaza og fanga- og gíslaumbýti varð kríggið tikið uppaftur í morgun.
Ísraelski herurin boðaði frá, at hann hevði steðga fleiri rakettálopum úr Gaza, eins og at stríðsflogfør vóru farin at leypa á Hamas-mál í Gaza.
Seinnapartin boðar herurin frá, at »yvir 200 yvirgangsmál« eru rakt.
Læknar og eygnavitni í Gazageiranum siga sambært tíðindastovuni Reuters, at bumbingarnar eru harðast í Khan Younis og Rafah, sum eru í syðra parti av Gazageiranum.
Har hevur ein stórur partur av sivilfólkinum søkt sær skjól fyri at vera í tryggleika.
Í dag flýggja nógvir íbúgvar aftur frá økinum og leita sær vestureftir við ognarlutum sínum á vognum og kerrum.
Í Rafah, sum er við markið til Egyptalands, bóru íbúgvar fleiri smá børn út úr einum bygningin, sum varð raktur í loftálopi. Fleiri børn vóru sveipað í blóði og dusti.
Mohammad Abu-Elneen, son tann sum eigur húsið, greiðir Reuters frá, at fólk vóru í húsinum, sum vóru rikin burtur úr øðrum pørtum av Gazageiranum.
Í norðara partinum at økinum síggjast tjúkk roykskýggj daga upp úr leivdum av teimum húsum, sum frammanundan eru løgd í oyði í loftálopu. Álopini síggjast frá ísraelsku síðuni av marknastikinum.
Undir vápnahvíldini hevur verið møguligt at fingið hart tiltrongda hjálp inn í tættbúsetta økið.
Sjálvt um bardagar aftur eru brostnir á í Gaza, halda samráðingarnar fram millum Ísrael og hernaðarliga palestinska felagsskapin Hamas.
Úr USA ljóar, at umsitingin hjá Joe Biden forseta enn roynir at trýsta á fyri at fáa vápanhvíld.
Tilsamans hava Hamas-myndugleikarnir boðað frá, at umleið 15.000 eru deyð í ísraelskum álopum í Gaza í kjalarvørrinum av álopunum hjá Hamas á Ísrael 7. oktober.
/ritzau/
