Sambært statsriknu egyptisku sjónvarpsrásini, Al Qahera, er Hamas-sendinevndin nú farin úr egyptiska høvuðsstaðnum, Kairo.
Tað veit tíðindastovan, Reuters, at siga.
Umboð fyri Hamas hava luttikið í samráðingum um eina vápnahvíld í Gazageiranum, har kríggj hevur verið seinasta hálva árið.
Hamas-umboðini siga, at tey fara at venda aftur við einum svari upp á uppskotið um vápnahvíld, sum er lagt fyri stríðandi partarnar.
Sambært bretska uttanríkisráðharranum, David Cameron, er Ísrael komið við einum tilboði um vápnahvíld í 40 dagar.
Ísraelska treytin fyri vápnahvíldini er, at Hamas letur gíslarnar leysar, sum felagsskapurin framvegis hevur í fangilsi í Gazageiranum.
