Hetta eru góðir og spennandi dagar hjá Ingibjørg Olsen og hennara liðfeløgum í ÍBV.
Fyri stuttum vunnu tær íslendsku steypakappingina, og nú hava tær vunnið grundspælið í bestu íslendsku hondbóltsdeildini.
Í dag vann ÍBV á heimavølli úti á Heimey stórsigur 41-27 á Selfossi. Í steðginum var ÍBV á odda 21-15.
Ingibjørg skoraði fýra mál fyri ÍBV í dag.
Sigurin merkir, at ÍBV er fremst við 36 stigum, tveimum stigum fleiri enn Valur undan seinasta umfarinum í grundspælinum. ÍBV er betri innanhýsis, og tí kann Valur ikki fáa ÍBV aftur.
Komandi leygardag spælir ÍBV móti Fram í Reykjavík. Sama dag tekur Valur móti KA/Þór.
ÍBV fær fyrimun av fleiri heimadystum í hálvfinalunum, og møguligum finalum um íslendska meistaraskapið við at hava vunnið grundspælið.
Seinast ÍBV vann grundspælið var í 2004, og seinast tær vunnu meistaraskapið var í 2006.
Støðan:
Lið: | Dystir | Málmunur | Stig |
ÍBV | 20 | 588:483 | 36 |
Valur | 20 | 580:473 | 34 |
Stjarnan | 20 | 538:469 | 29 |
Fram | 20 | 549:466 | 25 |
Haukar | 20 | 532:565 | 12 |
KA/Þór | 20 | 480:521 | 12 |
Selfoss | 20 | 516:615 | 8 |
HK | 20 | 432:623 | 4 |