Mótmælisfólk fara sunnudagin aftur á gøturnar á Mallorca í mótmæli móti hópferðavinnu.
Tað siga fleiri miðlar, eitt nú týska dpa.
Tað er felagsskapurin "Minni ferðavinna, meira lív", sum sambært tíðindastovuni NTB stendur aftan fyri mótmælisgongu sunnudagin í størsta býnum á Mallorca, Palma.
Boðað er eisini frá mótmælisgongum aðrastaðni á Balearisku oyggjunum, skrivar tíðindastovan.
Ætlaða mótmælisgongan sunnudagin er bara ein av fleiri mótmælisgongum í summar, har lokalu íbúgvarnir á Mallorca skulu vísa, at teir hava fingið nokk av frítíðarfólki.
Sambært sponsku løgregluni luttóku umleið 10.000 fólk í líknandi mótmælisgongu í Palma fyrr í summar.
Her ljóða slagorðini hjá mótmælisfólkunum millum annað, at "nokk er nokk" og "Mallorca er ikki til sølu".
Sambært fyrireikarunum sjálvum luttóku umleið 25.000 fólk í mótmælisgonguni.
Mótmælisgongur hava eisini verið móti hópferðavinnu aðrastaðni í Spania í summar. Millum annað í vælumtóktu ferðamannabýunum Barcelona og Malaga umframt á Kanarisku oyggjunum.
Í spanska miðjarðarhavsbýnum Barcelona í Katalonia vórðu ferðafólk enntá sproytað við vatni úr vatnbyrsum, meðan mótmælisfólk róptu: "Ferðafólk, farið heim".
Næst eftir Katalonia vóru Balearisku oyggjarnar, sum Mallorca er partur av, tey mest umtóktu frítíðarstaðini í Spania.
Tilsamans hildu 14,4 milliónir fólk frí í oyggjunum í fjør. Teirra millum nógvir danskir ríkisborgarar. Tað vísa tøl frá hagstovuni í Spania.
18 milliónir vitjaðu Katalonia og lokala høvuðsstaðin Barcelona. Á triðja plássi komu Kanarisku oyggjarnar við 13,9 milliónum ferðafólkum.
Samanumtikið er ferðavinnan alneyðug fyri fleiri partar av Spania, eisini Mallorka.
Mett verður, at ferðavinnan stendur fyri umleið 45 prosentum av búskapinum í oynni.
Men fleiri av íbúgvunum mugu gera sær dælt av illa løntum størvum og stríðast við høga bústaðarkostnaðin.
Nógv klaga eisini um endaleysar bíðirøðir í ferðsluni, nógvan larm og nógva dálking sum avleiðing av hópferðavinnu.
/ritzau/
