Norðurkorea sendir aftur ballónir við ruski um markið til Suðurkorea.
Tað sigur herurin í Suðurkorea í eini fráboðan sunnudagin.
Síðan mai hevur Norðurkorea sent umleið 2.000 ruskballónir móti grannalandinum.
Norðurkorea metir tað vera eitt aftursvar upp á sokallaðu propagandaballónirnar, sum landið hevur fingið frá Suðurkorea.
- Norðurkorea sendir enn eina sending av ballónum við ruski í, stendur í fráboðanini.
Her verður eisini sagt, at ballónirnar eru á veg móti norðara parti av Gyeonggi-landslutinum.
- Vinarliga melda tey til her ella løgregluna og haldið tykkum frá at koma í beinleiðis samband við lutirnar, verður sagt almenninginum.
Tað er ikki greitt, hvussu nógvar ballónir talan er um sunnudagin.
Nýggjasta sendingin av ballónum kemur tríggjar dagar eftir, at Suðurkorea aftur byrjaði at senda sonevnda hátalarapropaganda ímóti Norðurkorea.
Í Norðurkorea, sum í stóran mun er avbyrgt, eru tey langt frá glað fyri, at fólkið fær atgongd til til dømis suðurkoreansku poppmentanina.
Suðurkorea hevur eisini sagt, at tað fer at senda meira propaganda móti Norðurkorea, um Norðurkorea heldur fram at senda ballónirnar við ruski.
- Vit kunnu økja talið av hátalarum í marknaøkjunum, um Norðurkorea heldur fram við sínum provokatiónum, segði ein embætismaður her við tíðindastovuna Yonhap leygardagin.
Umframt at senda propaganda yvir hátalarar, sum eru ætlaðar Norðurkorea, hava suðurkoreanskir aktivistar eisini fyrr sent ballónir móti grannalandinum. Men í staðin fyri rusk hava tær verið fyltar við millum annað stríðsritum, sum eru kritiskar móti norðurkoreanska stýrinum.
Í fleiri av ballónunum hevur tú eisini kunnað funnið reiðan pening, rís ella USB-stikk við suðurkoreanskum dramarøðum.
Norðurkoreansku ruskballónirnar - sum áður hava verið fyltar við millum annað sigarettstubbum og brúktum wc-pappíri - hava elvt til órógv hjá fleiri enn 100 flogførum á veg til og úr landinum síðani mai, sigur Suðurkorea.
AFP
