Eitt vikuskifti í apríl gjørdi norska fiskiveiðieftirlitið kanningar fram við sjóvarmálanum í Oslofjørðinum, har tað ikki er loyvt at fiska í gýtingarøkjum fram til 1. mai.
Í Oslofjørðinum er bannað at fiska tosk alt árið.
- Í tíðarskeiðnum frá 1. januar til og við 30. apríl er allur fiskiskapur í 14 gýtingarøkjum í Skagerak-økinum og í Oslofjørðinum bannaður.
Kystmagasinet.fo veit at siga, at undantikið frá hesum forboði er fiskur, sum bæði livir í saltvatni og feskvatni, eitt nú sjósíl.
Norska fiskiveiðieftirlitið gjørdi kanningar innarlaga í Oslofjørðinum í tveir dagar. Sløk 100 fólk við tráðu og øðrum reiðskapi vórðu sædd at fiska í økinum hesar dagarnar.
- Flestu vóru útlendskir borgarar við avmarkaðum málkunnleika og lítlari vitan um norsku reglurnar, sum eru galdandi, og onkur fiskaði lógliga eftir sjósílum.
Á kanningarferðini royndu umboðini fyri fiskiveiðieftirlitið at greiða frá norsku reglunum, og tey flestu pakkaðu fiskireiðskapin saman í somu løtu, tey fingu boðini.
Talan er um eitt lutfalsliga stórt øki, sum eftirlitsfólkini kannaðu, og her eru oyggjar, hólmar og sund, men við skjóttgangandi báti bar til í tveir dagar at koma víða um.
- Vit tosaðu við 93 fólk, sum fiskaðu á bryggjuni og við klettin. Av hesum fiskaðu 32 í gýtingarøkjum, og 61 fiskaðu í gýtingarøkjum, har allur fiskiskapur er bannaður.
Av teimum 93, vóru 16 norðmenn. Hini øll vóru útlendskir ríkisborgarar, flestu gestaarbeiðarar úr eitt nú Póllandi, Rumenia, Lettlandi og Ukraina.
- Sjálv um fleiri hvørki skilja norskt ella enskt, klára vit ofta at greiða teimum frá, at tað er bannað at fiska - antin í gýtingarøkjum ella at fiska tosk í Oslofjørðinum sum heild, siga tey í Fiskiveiðieftirlitinum við www.kystmagasinet.fo