Ókendir gerningsmenn hava framt skaða á skjóttgangandi TGV í Fraklandi í eini røð av samskipaðum tiltøkum, sum hava elvt til stóra órógv nógv fólkaðu jarnbreytini í landinum undan ferniseringini á OL í París.
Franska jarnbreytarfelagið, SNCF, sigur, at tiltøk hava verið "sera umfatandi" og at jarnbreytarnetið hevur verið lamið.
- SNCF hevur verið offur fyri fleiri samskipaðum illviljaðum gerðum í nátt, stendur í fráboðan frá SNCF, sum sigur, at talan er um eldsbruna.
Ongin einstaklingur ella bólkur hevur higartil tikið ábyrgd av atgerðunum.
Eldsásetararnir eru farnir eftir fleiri tokum, sum binda París og onnur fronsk øki saman.
- Álopini hava rakt bæði Atlantshavs-, Norður- og Eysturlestarlinjuna. Tað fer væntandi at raka umleið 800.000 ferðafólk, stendur at lesa í fráboðanini fríggjamorgunin.
- Eldálop vórðu framd fyri at skaða okkara anlegg, sigur felagið, sum sigur, at ábøtur fara fram alt vikuskiftið, og tað førir til, at ein røð av tokum verða avlýst.
SNCF mælir ferðafólkunum til at útseta ferðina og sleppa undan tokstøðum.
Franski ítróttaráðharrin, Amélie Oudéa-Castéra, fordømir atgerðirnar.
- At leypa á leikirnar er at leypa á Frakland, sigur hon við sjónvarpsstøðina BFMTV.
Fernisering verður fríggjakvøldið á Seine í miðbýnum í París.
Her verða túsundtals íðkarar sigldir góðar seks kilometrar niðan eftir ánni, meðan umleið 600.000 áskoðarar væntandi fara at hyggja fram við Seine.
Summarleikirnir eru alment í París, men tiltøkini verða spjadd yvir eina røð av stórum og smáum býum í Fraklandi.
Trygdartiltøkini eru risastór. Sambært blaðnum Le Monde eru yvir 30.000 løgreglufólk og 10.000 hermenn umframt eyka trygdarfólk útsett undir ferniseringini.
Á Montparnasse-støðini í miðbýnum í París bíðaðu nógv ferðafólk eftir upplýsingum fríggjamorgunin.
- Vanliga ferðslan fer væntandi ikki í gongd aftur fyrr enn 29. juli, stendur at lesa í fráboðan frá SNCF.
- Vit komu higar klokkan sjey í morgun, og tá fáa vit at vita, at vit møguliga ikki sleppa at ferðast fyrr enn mánadagin, segði ein 27 ára gamli næmingurin, Jocelyn, sum skuldi ferðast til Bretagne fríggjadagin.
- Vit høvdu væntað, at tað fór at vera eitt sindur kaotiskt í París í dag, men vit høvdu ikki ímyndað okkum, at tað fór at vera so ringt, legði hon afturat.
AFP
