Spenningur um nýtt landsstýrisfólk hjá Tjóðveldi

Ikki er greitt, um Tjóðveldi fer at velja nýggja landsstýrisfólkið innanhýsis í tingmanning floksins, ella um farið verður út um tingmanningina. Møguleikarnir í tingmanningini eru ikki so stórir. Av teimum seks tingfólkunum eru fleiri, sum eru útilokað.

Sirið Stenberg og Høgni Hoydal sita í landsstýrinum. Av teimum seks tingfólkunum er sjálvandi Dennis Holm útilokaður. Tað eru Liljan Weihe og Erling Eidesgaard, sum ikki longur er tingmaður, eisini. Tey hava »svikið« Javnaðarflokkin, og tí er lítið hugsandi, at Tjóðveldi fer til Aksel V. Johannesen við ynski um forfremma annað teirra til landsstýrisfólk.

Annika Olsen er helst í so fesk í Tjóðveldi longu at koma í landsstýrið.

Bjørt Samuelsen fer ikki at leggja hægsta politiska starvið frá sær fyri at gerast landsstýrisfólk. Tí eru bara Hervør Pálsdóttir, tingkvinna, og Eirikur í Jákupsstovu, varatingmaður, eftir av teimum átta, sum í løtuni umboða Tjóðveldi á tingi og í landsstýri.

Eirikur í Jákupsstovu hevur verið nevndur fleiri ferðir. Hann er varamaður á tingi fyri landsstýrisfólk. Men hann er einasta umboð floksins á tingi norðan fyri Havnina. Fer hann í landsstýrið, so fær Havnin aftur ein tingsess, tí so kemur Erling Eidesgaard aftur í tingið. So hevur flokkurin fimm tingfólk úr Havn og ein úr Vági.

Um flokkurin í staðin velur ein persón uttan fyri tingmanningina, so stendur flokkurin fríari. Hann kann velja ein úr Norðoyggjum ella úr Eysturoy, har flokkurin als ikki er umboðaður.

Hyggja vit eftir listanum hjá Tjóðveldi til seinasta løgtingsval, so eru fleiri valevni uttan fyri Havnina á listanum, sum áður hava sitið í landsstýrinum. Eitt nú Páll á Reynatúgu, Annita á Fríðriksmørk, Óluva Klettskarð. Men tað kann fyri tað verður onkur heilt annar.

Sambert lógum Tjóðveldis, so er tað aðalstjórnin og tingbólkurin í felag, sum skulu tilnevna landsstýrisfólk, sum tingbólkurin tekur avgerð um. Fær eitt uppskot ikki meiriluta í tingbólkinum, so verður tað Sirið Stenberg, forkvinna í Tjóðveldi, sum skal taka endaligu avgerðina. Tað vil siga, um 4 av 6 tingfólkum ikki stuðla tí sama uppskotinum, so verður tað Sirið Stenberg, sum skal taka støðu.

Tjóðveldi kann eisini gera sum Fólkaflokkurin gjørdi í 2021, tá Elsebeth Mercedis Gunnleygsdóttir og Jacob Vestergaard løgdu landsstýrissessirnar frá sær fyri at kroysta Anniku Olsen, sum tá var varafólk á tingi fyri Fólkaflokkin, úr Løgtinginum. Tá fór Fólkaflokkurin eftir Árna Skaale sum landsstýrismann í fiskvinnumálum. Hann hevði ongantíð havt nakað við politikk at gera og var ikki ein gong limur í Fólkaflokkinum. 

Hesi stillaðu upp fyri Tjóðveldi á seinasta løgtingsvali: