Ísraelski forsætisráðharrin, Benjamin Netanyahu, tók í røðu fyri kongressini mikudagin upp stríðið við tey túsundtals fólkini, sum mótmæla uttanfyri kongressbygningin.
- Nógv velja at standa á somu síðu sum tað ónda. Tey standa í somu síðu sum Hamas, sigur Netanyahu.
Hann kallar mótmælisfólkini " hentar idiotar hjá Iran".
- Tey skulu skamma seg sjálvi, sigur hann.
Nógvir limir í kongressini reistust og klappaðu. Tó hildu fleiri seg eisini frá at klappa.
Í byrjanini av røðuni segði Netanyahu, at heimssøgan er á einum "vegamóti", og at USA, Ísrael og arabiski heimurin eru hótt av "ræðsluásinum" hjá Iran í Miðeystri.
Iran og Ísrael eru høvuðsfíggindar. Iran verður mett at vera ein av høvuðsstuðlunum hjá Hamas - um ikki tann størsti - og í apríl sendi Iran fleiri hundrað dronur og rakettir móti Ísrael sum hevnd fyri eitt illgrunasamt ísraelskt álop á iranska konsulátið í Damaskus.
Netanyahu kallar almennu støðuna í Miðeystri fyri "samanbrest millum barbarismu og siðmenning".
- USA og Ísrael mugu standa saman, sigur Netanyahu.
Um teir gera tað, "vinna teir".
- Eg kom higar fyri at vissa tykkum um eitt - at vit vinna, sigur hann.
Ísraelski forsætisráðharrin hevur verið á odda í álopinum hjá Ísrael á Gaza.
Tað varð sett í verk, eftir at hernaðarliga palestinska rørslan Hamas leyp á Ísrael 7. oktober - eitt álop, sum eisini fylti nógv í røðuni hjá Netanyahu.
Fleiri enn 30 demokratiskir limir í kongressini høvdu frammanundan ætlanir um ikki at vera við til røðuna, skrivar NBC News.
Røðan fyri kongressini er liður í fleiri daga vitjan.
Hósdagin fer Netanyahu at hitta bæði Joe Biden, forseta, og Kamala Harris, varaforseta, sum eftir øllum at døma verður forsetavalevni hjá demokratunum, eftir at Biden tekur seg aftur.
Fríggjadagin fer ísraelski forsætisráðharrin til Florida at hitta republikanska forsetavalevnið, Donald Trump.
/ritzau/
##med2##
##med3##
