Grundspælið í bestu donsku hondbóltsdeildini hjá kvinnum er nú liðugt.
Í seinasta umfarinum, ið var leikt í kvøld tók føroyingaliðið, Ajax móti Sønderjyske.
Tað endaði við einum 22-26 tapi hjá Ajax, ið var aftanfyri 8-11 í steðginum.
Tað gekk tó væl hjá Súnu K. Hansen, ið skoraði fýra mál, legði upp til eitt mál, og vann liðnum heili seks brotskøst í dystinum í kvøld. Súna var saman við Simone Pedersen toppskjútti hjá Ajax í kvøld.
Ajax endar aftast í deildini við sjey stigum, men húsagangurin hjá Randers bjargar Ajax frá at flyta beinleiðis niður í næstbestu deildina. Ajax skal nú kappast í einum endaspæli, har málið verður at halda plássið í bestu deildini.
Tað var dúkað til føroyingauppgerð í Keypmannahavn, tá liðið hjá Pernillu Brandenborg, Keypmannahavn tók móti liðnum hjá Anniku Fríðheim Petersen, Nykøbing Falster. Men Annika fekk tíverri ikki spælitíð í kvøld.
Nykøbing Falster vann annars dystin 40-34 (22-15). Pernille skoraði eitt mál fyri Keypmannahavn í kvøld.
Nykøbing Falster endar grundspælið á einum fjórða plássi við 30 stigum, meðan Keypmannahavn endar grundspælið á einum sætta plássi við 29 stigum. Bæði eru tí tryggjaði pláss í endaspælinum um at gerast danskur meistari.
Endaliga støðan í grundspælinum:
Nr. | Lið: | Dystir | Stig |
1 | Odense | 24 | 43 |
2 | Team Esbjerg | 24 | 41 |
3 | Ikast | 24 | 36 |
4 | Nykøbing Falster | 24 | 30 |
5 | Viborg HK | 24 | 30 |
6 | Keypmannahavn | 24 | 29 |
7 | Silkeborg-Voel | 24 | 21 |
8 | Aarhus United | 24 | 19 |
9 | Horsens | 24 | 18 |
10 | Ringkøbing | 24 | 15 |
11 | SønderjyskE | 24 | 12 |
12 | Skanderborg | 24 | 11 |
13 | Ajax | 24 | 7 |