Seinasta dag í 2024 og seinasta dag hjá undanfarna bygdaráði í Eiðis kommunu varð sáttmáli undirskrivaður við Sp/f Búð um bygging av húsinum Millum Vatna á Eiði.
Ætlanin var, at á økinum norðanfyri fótbóltsvøllin, tætt við dagstovnin Korndalsgarð og Hólmahúsið, soleiðis sum viðhefta mynd her omanfyri vísir, var ætlanin at byggja ein nýggjan og nútímans bygning.
- Húsið fer at avloysa núverandi Eiðisstovu, frítíðarskúla og ungdómshús. Nýggja húsið verður í tveimum hæddum á umleið 450 fermetrar hvør hæddin. Tað verður hitað við grønari orkuskipan, varð sagt í Eiðis kommunu um verkætlanina.
Lagt varð aftrat, at nýggi bygningurin verður ein nýggjur miðdepil fyri samveru og fjølbroyttum frítíðarvirksemi í kommununi. Húsið er ætlað sum eitt stað, har tey ungu saman við teimum eldru verða við til at skapa og menna felagsskapin.
Men, eftir fyrsta almenna fundin í nývalda bygdaráðnum í Eiðis kommunu seint í gjár er greitt, at henda verkætlan verður av ongum. Nývalda bygdaráðið samtykti við fýra atkvøðum fyri og tveimum blonkum at steðga verkætlanini.
Sambært nývalda borgarstjóranum í Eiðis kommunu, Jógvani í Skorini, kann verkætlanin ikki setast í gongd - í fyrsta lagi tí, at byggisamtytin fyri økið er ikki broytt, og tískil er byggingin eisini ólóglig.
In.fo fer at venda aftur til málið um ætlaða húsið Millum Vatna á Eiði.
