14 norskir ríkisborgarar, sum hava tilknýti til Noregs, eru í dag hjálptir úr Gazageiranum av norsku myndugleikunum.
- Eg fegnist um, at vit hava fingið fleiri norskar ríkisborgarar úr Gaza, harav helmingurin eru børn.
Tað sigur norski uttanríkisráðharrin, Espen Barth Eide, í tíðindaskrivi, sum norska kringvarpið NRK endurgevur burturúr.
- Hesi fólk hava livað í neyð og ótta í einum krígsøki, síðan kríggið byrjaði fyri 17 mánaðum siðan, leggur hann aftrat.
Tey 14 vórðu flutt úr Gazageiranum um Kerem Shalom-skiftið til Ísraels, og her vórðu tey møtt av umboðum fyri norsku sendistovuna í Ísrael.
Tað var Jordan, sum hjálpti til við neyðugum ferðaskjølum og øðrum.
Norsku ríkisborgararnir verða nú fluttir í bussi til Jordan, har norska sendistovan í Amman tekur sær teimum, áðrenn tey sleppa víðari til Noregs.
