Eftir fjúrtan ár í útlegd, vendi Brandur Hendriksson Olsen í vetur heim til føroyskan fótbólt, og tað er neyvan ov nógv sagt, at skálvíkingurin í NSÍ av álvara hevur sett síni fótaspor og dagsskránna í fleiri av dystunum í Betrideildini hjá monnum.
Við sínum smidligu vendingum og neyvu sendingum, sum vit eisini kenna so væl frá landsliðnum, og fleiri góðum frísparksmálum, er Brandur uttan iva ein av orsøkunum til, at NSÍ liggur fremst í landskappingini við fullum stigatali.
– Eg kann ikki siga annað enn, at tað hevur gingið væl, og eg eri follin væl til í Runavík og NSÍ. Men eg haldi at vit hava eitt gott lið, og eitt gott venjaratoymið, og higartil er alt meir ella minni gingið upp í eina hægri eind. Men arbeiðið er ikki liðugt enn, og tað ræður alla tíðina um at vera klárur, tí kappingin er hørð, og hini liðini eru góð, sigur Brandur Olsen við heimasíðuna hjá FSF.
Tað eru landsliðsvenjarar, miðlafólk og viðmerkjarar, ið atkvøða fyri besta spælara hvønn mánað, og tá talt var saman fyri mars mánað hevði Brandur Hendriksson Olsen fingið flestar atkvøður. Aðrir, ið eisini fingu væl av atkvøðum, vóru allir úr NSÍ – Klæmint Olsen, Petur Knudsen og Jasper Van Der Heyden.
Fyri heiðurin fekk Brandur Olsen handað eitt gávubræv upp á 1.000 krónur frá Hotel Brandan, og eina glasstandmynd, ið er latin av FSF.
Tað vóru foreldrini hjá Brandi, Agnas og Hendrik Olsen, ið vegna Fótbóltssamband Føroya handaðu soninum prógvið upp á, at hann var besti spælari í fremstu deildini hjá monnum í mars 2025.
##med2##
Løtan áðrenn foreldrini handaðu Brandi prógvið upp á, at hann var besti spælari í mars mánað – Mynd: Jóhanna Thomsen
