Fyrstu umførini hevur tað ikki verið nakað at reypa av hjá niðurflytarunum í Fuglafirði.
Eftir heimatap ímóti teimum næstbestu hjá Víkingi var úrtøkan tvey stig – javnleikir á útivølli ímóti B36 og AB.
Í kvøld eydnaðist tað at vinna fyrsta sigurin. Teir næstbestu hjá 07 Vestur vóru í Fuglafirði, og teir fóru úr Fløtugerði og vestur aftur við 2-1 tapi í viðførinum. 07 Vestur bíðar framvegis eftir fyrsta stiginum.
Hálvleiksstøðan í Fuglafirði í kvøld var málleysur javnleikur.
Øll málini vórðu skorað síðstu tíggju minuttirnar.
Ari Dahl Olsen, sum varð skiftur inn beinanvegin eftir steðgin, legði 07 Vestur á odda. Ein minutt seinni javnaði ÍF. Tá var tað 07 Vestur, sum gjørdi sjálvmál og so var 1-1.
Fimm minuttir vóru lagdir aftrat vanligu leiktíðini, og í evstu løtu eydnaðist tað ÍF at skora sigursmálið. Málskjútti var Rúnar C. Joensen, og Dánjal á Lakjuni átti uppleggið.
Annan sunnudag fer ÍF aftur at spæla landskappingardyst. Tað verður á útivølli ímóti B71.
Næsti dystur hjá 07 Vestur verður annan leygardag í Klaksvík.
