Vestmanna.fo skrivar:
Vestmanna kommuna er farin undir at grava bakkan burtur niðan fyri faktorhúsið og pakkhúsið á Fitjum. Har, sum grasbakkin er í dag, stóð kongaligi einahandilin, og gamlar myndir vísa slætta vakra hellu, laðaðan garð fram við sjóvarmálanum og eitt fiskastykki.
– Hetta er spennandi arbeiði, sum undanfarna bygdarráð setti á skinnaran. Einahandilin hevur eitt søguligt virði, samstundis sum upprunaliga lendið er so mikið vakurt, eftir tí, sum eg havi sæð á gomlum myndum, at tað er synd at krógva burtur undir einum grasbakka, sigur Sára Jógvansdóttir, borgarstjóri.
Tá ið tað síðst í 1940’unum var farið undir at byggja nýggjan fólkaskúla í bygdini, var tørvur á formum og viði. Í hesum sambandi var yvirparturin av kongaliga einahandlinum tikin niður og brúktur aftur í skúlanum. Grundin av einahandlinum var standandi.
Seinni varð mold lempað út av kantinum og yvir grundina, og við tíðini hvarv grundin, tann laðaði garðurin, hella og fiskastykkið.
Tað hevur verið ivasamt, um grundin og laðingar vóru rapaðar eftir øll hesi ár, men nú er so staðfest, at í øllum førum eystara síða av handilsgrundini stendur og eisini er komið fram á ein part av laðaða garðinum framvið sjóvarmálanum. Um alt framvegis stendur, fara næstu dagarnir at vísa.
##med2##
##med3##
##med4##
