Ísraelsk stríðsflogfør hava framt álop í Jemen, dagin eftir, at Houthi uppreistrarmenn tóku ábyrgdina av einum rakettálopi á høvuðsflogvøllin í Ísrael.
Tað sigur ísraelski herurin í eini fráboðan, sambært tíðindastovuni Reuters.
- Álopið varð framt sum svar uppá endurtøku av álopum, sum Houthi-yvirgangsstýrið hevði framt móti Ísrael, har jørð-til-jørð-rakettir og ómannað loftfør vórðu skotin móti økinum hjá ríkinum og íbúgvunum, stendur í fráboðanini.
Sambært AFP boða Houthiarar eisini frá álopum í havnabýnum Hodeidah. Sambært Houthi eru tað Ísrael og USA, sum hava framt álopini.
Ein dulnevndur amerikanskur embætismaður sigur við Reuters, at amerikanskar herdeildir ikki vóru við í álopinum í dag, men at Ísrael og USA samskipaðu.
Miðilin Al Masirah TV, sum Houthi stýrdi, boðar frá, at USA og Ísrael hava rakt havnina í Hodeidah við seks álopum.
Sambært Reuters er havnin tann næststørsta í Reyðahavinum og er inngongd fyri umleið 80 prosent av innfluttum matvørum til Jemen.
Frammanundan skrivaði tíðindastovan Saba hjá Houthi-rørsluni, at amerikansk álop høvdu rakt høvuðsstaðin, Sanaa, umframt vegin til flogvøllin. Tað særdi 16 fólk, upplýsir heilsumálaráðið hjá rørsluni.
Sunnudagin rakti ein rakett nærhendis Ben Gurion flogvøllinum, ikki langt frá stórbýnum Tel Aviv. Flogvøllurin er tann týdningarmesti og størsti í Ísrael.
Eingin fekk álvarsligan skaða av hendingini.
Sambært ísraelska løgregluleiðaranum, Yair Hezroni, er eitt "kratur, sum er fleiri tíggjutals metrar breitt og djúpt", har rakettin rakti.
Síðani segði ísraelski verjumálaráðharrin, Israel Katz, at landið fór at hevna.
- Vit fara at sláa aftur við sjeyfaldum valdi móti tí, sum leypur á okkum, sigur Katz sambært tíðindastovuni dpa.
Houthi-rørslan, sum ræður yvir størsta partinum av Jemen, hevur lopið á Ísrael og skip í Reyðahavinum síðani kríggið byrjaði millum Ísrael og Hamas. Houthis siga, at álopini eru í samhuga við palestinar í Gaza.
/Ritzau/
