Inntil í dag minti máltalvan á Løkinum í Runavík á, at NSÍ sunnudagin vann 11-0 í grannauppgerðini ímóti B68.
Í kvøld var slætt borð á talvuni, tá ið dómarin bríkslaði fyri fyrstu ferð. NSÍ hevði vitjan av 07 Vestur, sum sunnudagin megnaði málleysan javnleik í Sarpugerði.
NSÍ helt fram í sama lagi sum sunnukvøldið, hóast málmunurin ikki var so stórur, sum hann var síðst.
Serliga var Klæmint A. Olsen, sum vísti seg at vera væl upplagdur og í málhýrinum, sum metmaðurin so mangan hevur verið í.
Klæmint A. Olsen skoraði trý mál, og nú hevur hann í fýra dystum skorað átta mál.
NSÍ er ovast á stigatalvuni við fullum stigatali og málmuninum 22-4. Mánakvøldið fer NSÍ at spæla í steypakappingini á útivølli í Sarpugerði í Gøtu, har NSÍ fyrr í ár vann 3-0. Næsti landskappingardysturin hjá oddaliðnum verður annan sunnudag í Trongisvági.
Klæmint var fyrstu ferð upp á spæl eftir stórar fimm minuttir, og miðskeiðis í fyrra hálvleiki var tað miðvallarin Emil Weihe Joensen, sum økti um heimaleiðsluna til 2-0.
Í minuttinum, sum dómarin legði aftrat fyrra hálvleiki, eydnaðist tað 07 Vestur at minka um munin og harvið av álvara at kveikja undir vónina um, at tað kundi fara at eydnast at vinna stig. Málskjútti var Nicolai Møller Dohn, og uppleggið átti Mikkel Elbæk Jakobsen, sum áður hevur spælt við NSÍ.
Vónin hjá 07 Vestur fekk av álvara skot fyri bógvin miðskeiðis í seinna hálvleiki, tá ið Klæmint . Olsen aftur var upp á spæl eftir innlegg frá Peturi Knudsen.
NSÍ spældi seg til fleiri góðar málmøguleikar, og eyðsýndasti spælarin hjá 07 Vestur var málverjin Ari í Haraldstovu Petersen.
Seks minuttir undan leikloki staðfesti NSÍ 4-1 heimasigurin. Aftur var tað Klæmint A. Olsen, sum var málskjútti, og aftur var tað Petur Knudsen, sum átti uppleggið.
Næsti dystur hjá 07 Vestur í landskappingini verður annan sunnudag, tá ið FC Suðuroy verður mótstøðuliðið í Sørvagi. Mánakvøldið fer 07 Vestur í steypakappingini at spæla ímóti B36 í Sørvági.
