Tað endaði 2-0 til gestirnar, tá ið B68 í kvøld hevði vitjan av stórfavorittunum í KÍ.
Hálvleiksstøðan var málleysur javnleikur, og meðan talan framvegis var um málleysa uppgerð, gekk tað fyri seg eftir treytunum hjá heimaliðnum. B68 avrikið vísti, at toftamenn høvdu vaskað fleingjuna sunnukvøldið í Runavík av sær.
Tølini siga, at klaksvíkingar áttu flestu royndirnar ímóti málinum, hóast talan ikki var um so nógvar upplagdar møguleikar og KÍ vann 11 hornaspørk, meðan B68 vann trý hornaspørk.
Sjey minuttir eftir steðgin broyttust fyritreytirnar hjá B68 at verja eina stigið. Tá var tað KÍ miðvallarin og landsliðsspælarin og hálvi toftamaðurin Hallur Hansson, sum eftir horna setti bóltin í málið.
Miðskeiðis í seinna hálvleiki økti KÍ um leiðsluna til 2-0, og so lá tað í luftini, at KÍ eisini eftir henda dystin fór at eiga fulla úrtøku. 2-0 málskjútti var vongverjin í høgru Jóannes K. Danielsen. Eftir horna datt bólturin niður mitt fyri og á brotsteigarmarkinum, har Jóannes K. Danielsen við innarusíðuni setti bóltin dygst undir samankomingini.
Hjá B68 vóru Jákup N. Vilhelmsen og Sebastian Lau Nielsen ikki við, tí teir eru leikbannaðir. Í dag fekk B68 boð um, at Jákup er leikbannaður í tveimum dystum, og at Sebastian er leikbannaður í trimum dystum.
Hjá KÍ var René Shaki Joensen ikki við, og tíggju minuttir undan leikloki noyddist Deni Pavlovic skaddur av vøllinum. Hann hevur higartil í ár verið millum teir eyðsýndastu, og seinastu ferðirnar hevur hann verið sera sjónskur í miðverjuni undir liðini á Odmar Færø.
Eins og í 2-1 heimasigrinum ímóti EB/Streymi sunnudagin, so var KÍ avrikið ikki serliga sannførandi. Hvussu væl liðið við nógvu landsliðsspælarunum er fyri fer ábending at fáast um mánakvøldið, tá ið steypadystur í Gundadali ímóti HB verður á skránni.
B68 fer mikukvøldið í steypakappingini at spæla á heimavølli ímóti ÍF.
