Milliarderurin og stovnarin av Tesla, Elon Musk, leggur frá sær sum ráðgevi hjá amerikansku stjórnini komandi vikurnar.
Tað siga tríggjar dulnevndar keldur, sum eru nær Donald Trump, forseta, við Politico.
Tað er eftir øllum at døma Trump sjálvur, sum hevur boðað frá hesum fyri millum øðrum fleiri limum í stjórnini.
Elon Musk hevur ein framúr leiklut sum ráðgevi og leiðandi persónur í nýstovnaðu Office of Efficiency í USA.
Hvítu Húsini siga sambært Reuters, at Musk fer at siga seg úr starvi, tá arbeiðið á Effektivitetsskrivstovuni er liðugt.
Tað er tó ikki greitt, nær arbeiðið væntandi verður liðugt.
Í greinini hjá Politico stendur, at Trump eftir øllum at døma er nøgdur við átøkini hjá Musk, men at teir báðir politisku samstarvsfelagarnir eru samdir um, at Musk skal venda aftur til sínar fyritøkur og taka ein meira stuðlandi leiklut politiskt.
Fram til amerikanska forsetavalstríðið í fjør var Musk best kendur fyri at stovna elbilafyritøkuna Tesla, fyri at hava keypt X - fyrrverandi Twitter - og fyri rúmdarfyritøkuna SpaceX.
Men undir valstríðnum í USA lýsti hann sítt politiska tilknýti og kom fram sum ein sterkur stuðul hjá republikanska Donald Trump.
Sambært Politico kemur fráboðanin um at Musk fer í eini tíð, har alsamt fleiri politiskir sameindir bæði innan og uttan fyri Trump-stjórnina hava víst ónøgd við Musk.
Tey mugu vera vorðin ørkymlað av, at hann virkar óforútsigiliga, og tey mugu í størri mun síggja hann sum eina politiska byrðu fyri Trump-leguna.
Millum annað vísa fleiri fólk á, at Musk hevur verið vánaligur at miðla sínar politisku ætlanir til sínar starvsfelagar í stjórnini, áðrenn hann alment hevur kunngjørt ætlanirnar um millum annað X. Hóast Trump og hansara fólk - eisini Elon Musk - bert hava verið við valdinum síðani 20. januar, hava stórar broytingar longu verið.
Skerjingar í almennu skipanini hava ført til, at túsundtals starvsfólk á ríkisstovnum eru uppsøgd og ført til, at USAID, sum er heimsins størsti menningarhjálparstovnur, er stongdur.
Eftir at Musk gjørdist partur av amerikansku stjórnini, hevur tað gingið niðureftir hjá Tesla, sum hann eigur 12 prosent av.
Leveringar hjá Tesla minkaðu við 13 prosentum fyrsta ársfjórðing 2025 um allan heimin í mun til sama ársfjórðing í fjør, vísa tøl, sum vóru kunngjørd fyrr í dag.
Og í Danmark fór sølan av Tesla-bilum meira enn niður í helvt fyrsta ársfjórðing í ár í mun til sama tíðarskeið í 2024. Beint eftir fráboðanina um, at Elon Musk skjótt leggur frá sær starvið í Trump-stjórnini, hækkaðu partabrøvini hjá Tesla við trimum prosentum, skrivar Reuters.
Fyrr í dag - beint eftir tíðindini um afturgongdina hjá Tesla - fall partabrævið hjá Tesla 6,4 prosent.
/ritzau/
