Í morgin, hósdagin hin 3. apríl, verður Bjarni Joensen, smiðjumeistari, 90 ár, og í samband við dagin verður høvi at heilsa uppá Bjarna í bygdarhúsinum í Miðvági frá klokkan 17-19, har øll eru vælkomin.
Á heimasíðuni hjá Vága kommunu í dag verður greitt frá Bjarna og hansara virksemi, har maðurin frá ungum árum serliga hevur arbeitt við menning av útgerð til fiskivinnuna.
- Sum ungur alvur tók hann við leiðsluni av smiðjuni í Miðvági, J. K. Joensen, sum seinni fekk navnið Oilwind. Smiðjan varð stovnað í 1910 av Haraldi Joensen, sum var abbi Bjarna.
Lagt verður aftrat, at pápi Bjarna, Jákup Karl Joensen, fór at starvast í smiðjuni hjá Haraldi í 1933, og í 1957 kom Bjarni Joensen sum 22 ára gamal inn í familjufyritøkuna, og fekk tá næstan beinanvegin ábyrgdina av smiðjuni.
- Hetta merkti so eisini, at Bjarni fekk ábyrgdina av, at nóg mikið av arbeiði var til fólkið, sum starvaðist í smiðjuni, og hetta var altíð frammaliga í huganum hjá honum.
Smiðjan fekk navnið J.K. Joensen & Sonur, og smiðjan fór undir leiðsluni hjá Bjarna Joensen at hugsavna seg um at menna og framleiða útgerð til fiskivinnuna.
- Bjarni hevur altíð verið framsíggin og kreativur, ein uppfinnari. Umframt at hava ábyrgd av leiðsluni í smiðjuni, hevur hann eisini havt sín stóra leiklut í at menna útgerð til fiskivinnuna.
Hann hevur havt ein leiklut í at menna alt frá funktionaliteti, góðsku og til design. At Bjarni var uppfinnari og veruligur íverkseti sást eisini í nógvu framleiðslunum hjá smiðjuni.
- Smiðjan er kend fyri Vágasnelluna, men smiðjan hevur eisini framleitt trolspøl, línuspøl og spøl til garnaveiðu.
Víst verður á, at eitt skifti í 1980-unum arbeiddi smiðjan enntá við at framleiða vindmyllur, og tað var sum vera man langt frammanundan, at tað gjørdist vanligt at tosa um grøna umskiftið.
- Av nógvum ymsum verkætlanum framleiddi smiðjan eisini ein buss heilt frá grundini saman við øðrum eldsálum í oynni.
Bjarni Joensen var við til at menna kendu Vágasnelluna, sum J. K. Joensen eisini fekk patent uppá. Hon hevði loysnir, ið lættu munandi um hjá teimum, sum brúktu snellurnar.
- Vágasnellan var so mikið góð, at hóast patentið varð hon kopierað av øðrum framleiðarum.
Tað var ikki Bjarni einsamallur, sum uppfann og menti Vágasnelluna.
- Bjarni legði í sínum starvi altíð dent á týdningin av at hava dugnalig starvsfólk rundan um seg. Starvsfólk í smiðjuni hava havt sín stóra leiklut í menningini av Vágasnelluni og fiskiútgerðini annars og í leiðsluni av fyritøkunum, sum hann hevur verið stjóri í.
Eisini legði Bjarni Joensen dent á at hava tætt samstarv við útróðrarmenninar og skipini, sum brúktu útgerðina.
- Umframt at hann hevur virðismett fólkini, hann hevur samstarvað við, hava hesi samstørv eisini havt stóran týdning fyri menningina av Vágasnelluni og sum heild, at tann útgerð, sum bleiv ment og framleidd í smiðjuni, hevur havt so høga góðsku.
Bjarni Joensen er eisini familjumaður. Hann og Gurli, kletturin og stjórin heima, hava átta børn og ein stóran hóp av abbabørnum, langabbabørnum og nú eisini oldurabbabørn.
Meira um mannin, sum í morgin fyllir 90, kann lesast á heimasíðuni hjá Vága kommunu - www.vaga.fo
