Tíðindaskriv:
Forvitnisliga altjóða tøkni og listaráðstevnan TONIK, verður í SILO í Sjóvinnuhúsinum 9.mai.
Hetta er triðja árið at skipað verður fyri festival líknandi ráðstevnuni, sum hevur verið útseld hvørt ár. Ráðstevnan er ein heildaruppliving, ein heilur dagur frá morgni til myrkurs við fyrilestrum, tónleiki og listarligum upplivingum. Tað vera tríggir pallar við kveikjandi og læruríkum fyrilestrum um eitt nú leiðslu, marknaðarføring, vitlíki, havtøkni, KT trygd, burðardygd, gaming, list og íløgur.
Ein av fyrilestrahaldarunum á TONIK 2025 er Stewart Bewley.
Stewart stovnaði fyritøkuna Amplify í 2011. Síðani tá hevur hann vegleitt yvir 22.000 fólkum í 92 londum í at gerast tryggir og sannførandi samskiftarar. Stewart brennir fyri at hjálpa sínum viðskiftafólki at gerast trygg í at fortelja sína søgu og bera teirra boðskap fram á ein sannførandi hátt. Hann hevur verið ráðgevi hjá Microsoft síðan 2015 og hjá Google síðan 2018, umframt at hann hevur vant søludeildina hjá Visa í Bretlandi og Írlandi.
Stewart Bewley fer at vísa, hvussu tú fangar áhoyrarar – óansæð um tú leggur eina ætlan fram fyri íleggjarum ella skalt hava fullkomið tamarhald á einum nevndarhøli.
Stórar fyritøkur sum Salesforce, SAP, Siemens, BASF, GE, Bloomberg og Dow Jones eru millum hansara kundar. Stewart hevur ferðast kring USA saman við Steve Case, stovnara av AOL og tey 400 fremstu íverksetarafeløgini, sum hann hevur vegleitt, hava savnað yvir 9 milliardir dollarar í íløgum.
Í mars 2023 gav Stewart út sína fyrstu bók, The Storytelling Hero, á forlagnum Wiley. Nú er hann klárur at geva út aðru bók sína: The Confident Communicator Toolkit.
Framløgan hjá Stewart verður á enskum og heitið er: Pitch Like a Pro – Win Your Audience With Your Story.
Les meira um ráðstevnuna og fyrilestrarhaldararnar á www.tonik.fo
Tað eru Hugskotið, Vinnuframi, Íverksetarahúsið, Framtak og Uttanríkis- og vinnumálaráðið, sum skipa fyri TONIK og Elektron er høvuðsstuðul í 2025.
