Fípan Fagra hevur vunnið undanfarnu ferðirnar, men í dag endaði Fípan Fagra við kvinnum næstfremst.
Orsøkin til, at Fípan Fagra ikki var fyrst á mál í dag, var, at ein bátur var við í kappingini og vann, sum ikki hevur verið við higartil í ár.
Tað var Pílur hjá Róðrarfelagnum Knørri, sum bjóðaði seg fram í dag og vann.
Umborð á Pílinum sótu tær, sum undanfarnu tríggjar ferðirnar hava vunnið við 6-mannafarinum Jarnbardi. Í kappingini millum 6-mannaførini hava tær verið so suverenar, at talan ikki hevur verið um kapping. Tí bjóðaðu tær seg í dag fram í kappingini millum 5-mannafør við kvinnum, og ta kappingina vunnu tær eisini.
Sigurin var rættiliga sannførandi – tað mesta av tveimum bátslongdum – og so er spurningurin, hvussu tað verður í teimum trimum kappingunum, sum eru eftir í ár. Hóast Fípan Fagra ikki vann í dag, so styrkti Fípan Fagra um sína støðu í FM kappingini. Í FM kappingini er Tjaldrið næstfremst og Drekin er á triðja plássi. Í dag var Fípan Fagra næstfremst, meðan bæði Firvaldur og Erla Kongsdóttir vóru frammanfyri Tjaldrið og Drekan.
##med2##
