Arbeiðsfólk, veitarar, umboð fyri Sands kommunu og Sev vóru møtt í nýliga innilokaðu koblingarstøðini á Sandi.
Sev skrivar, at bygningurin, sum er staðsettur inni í grótbrotinum í bygdini, er 962,5 fermetrar til støddar í partvís tveimum hæddum og skal millum annað hýsa 60 og 20 kV avbrótarum og transformarum.
Fyritøkan Norcon Betong og Timbur úr Vági hevur staðið fyri planering og byggiarbeiði, meðan El Net og RenoVent standa fyri ávikavist elarbeiðnum og ventilatiónini. Brim arkitektar hava teknað, Landsbyggifelagið er konstruktiónsráðgevi og SMJ hevur verkætlanarleiðsluna.
Arbeiðið hevur higartil gingið væl og tíðarætlanin er hildin.
Endamálið við 60/20 kV koblingarstøðini er fyrst og fremst at styrkja og framtíðartryggja netið í Sandoynni, har fleiri útbyggingar eru fyri framman. Eitt nú smoltstøð í Skálavík og vindmyllulund í Klivaløkshaga.
Harumframt er hetta eisini liður í at styrkja netið í Suðuroy, har stórar útbyggingar við øktum elorkutørvi somuleiðis standa fyri framman. Um ikki ein tunnil til Suðuroyar kemur í bræði, verður farið undir at leggja sjókaðal til Suðuroyar fyri at knýta elnetið í Suðuroy í netið í meginøkinum, sigur Jón Nielsen, deildarstjóri fyri netið.
Koblingarstøðin hevur verið í umbúna síðani 2006, segði Jón Nielsen, so tað var stórt at kunna staðfesta, at arbeiðið nú er komið so mikið ávegis, at støðin er innilokað og avskildrað.
Afturat verandi nýreista bygningi skal ein battaríhøll á 586 m2 eisini byggjast. Endamálið við henni er at hýsa battarískipan, sum skal balansera orkuna frá komandi vindmyllulundini í Klivaløkshaga.
Báðir bygningar væntast at standa lidnir um ársskiftið, og skipanirnar at verða settar í rakstur á heysti 2026.
