Ísraelski forsætisráðharrin, Benjamin Netanyahu, er lendur í Ungarn í morgun, hóast handtøkuboð eru frá altjóða revsidómstólinum ICC um at handtaka forsætisráðharran.
- Vælkomin til Budapest, Benjamin Netanyahu, skrivar verjumálaráðharrin í Ungarn, Kristof Szalay-Bobrovniczky, í sosialum miðlum í morgun, og hetta skrivar hann í samband við, at hann sambært Aftonbladet tók ímóti Netanyahu á flogvøllinum í Budapest í morgun.
Tað er Viktor Orbán, forsætisráðharri, sum hevur boðið ísraelska starvbróðuri sínum á vitjan.
Orban hevur vissað Netanyahu um, at Ungarn ikki aktar boðini hjá ICC um handtøku, tó at Ungarn telist millum londini, sum hava bundið seg til at handtaka ísraelska leiðaran fyri krígsbrotsverk.
Ungarn er fyrsta evropeiska land, sum ísraelski forsætisráðharrin vitjar, efti at ICC hevur sent út handtøkuboðini, sum eisini fevna um ísraelska verjumálaráðharran, Yoav Gallant.
Boðini hjá ICC eru, at teir báðir skulu handtakast, tí ICC sigur, at teir hava framt krígsverk móti mannaættini í Gazageiranum, og at teir brúkt hungur sum vápn við at avmarka flutning av neyðhjálp til Gazageiran.
Ísrael hevur afturvíst ákærurnar hjá ICC og sigur, at avgerðin hjá altjóða dómstólinum er "antisemittisk".
ICC hevur eisini sent út handtøkuboð móti yvirgangsdømda hernaðarleiðaranum hjá Hamas, Mohammed Dayf, men hesin er so seinni staðfestur deyður í ísraelskum álopum í Gazageiranum.
