Tíðindi

Royn tína vitan í verki sum tekniskur studentur

– Vit eru rættiliga glað fyri, at vit liggja í hjartanum av Klaksvík, sigur Kjartan Gaard Sleire, leiðari á Tøknibreytini. Umframt at blíva tekniskur studentur, kanst tú her fáa vinir fyri lívið og fyrireika teg til víðari lestur

Úr Lestrarblaðnum í Sosialinum 21. februar

 

Á Tekniska Skúla í Klaksvík kanst tú taka eina 3 ára tøkniliga miðnámsútbúgving (HT) har tú kanst fyrireika teg til útbúgvingar á hægri stovni.

 

Í mun til aðrar miðnámsútbúgvingar, kanst tú á Tøknibreytini her royna tína bókligu vitan í verki.

 

Tað ber sum nakað nýtt til at velja ímillum tvær ymsar leiðir. Eina vanliga Tøknibreyt, og eina Ítrótta- og Heilsubreyt.

 

Tøknibreytin er til teirra, sum væl dáma at fáast við tøkni og fordjúpa seg í tí. Tað kann vera at menna nýggj produktir, gera appir og so framvegis.

 

Ítrótta- og heilsubreytin er meira til teirra, sum hava áhuga fyri ítrótti og heilsu. Sum næmingur hevur tú bæði møguleika fyri at íðka eina rúgvu av ítrótti, men eisini fáa eina ástøðiliga tilgongd til kropp og heilsu. Lestrarleiðirnar eru Biotøkni A og Ítróttur B.

 

Fokus á verkætlanir

 

Arbeiðshátturin á tøknibreytini brýtur nokkso nógv frá tí klassiska miðnámsskúlanum. Tí umframt vanliga floksundirvísing er undirvísingin í stóran mun skipað sum verkætlanir og fer fram á starvsstovum, royndarstovum og verkstøðum.

 

– Næmingarnir læra seg at koma við einum hugskoti, menna tað og avikla tað. Á hendan hátt fært tú roynt skúlalærdómin í verki, fortelur Kjartan Gaard Sleire, leiðari á Tøknibreytini.

 

– Einstaki næmingurin hevur tí stóra ávirkan á, hvønn veg man fer í ymsu lærugreinunum.

 

Hesin hátturin er væl umtóktur.

 

– Tey flestu síggja positivt uppá tað, tí tað hevur hjálpt teimum væl víðari. Kanska serliga hjá teimum, sum eru farin inn at lesa Heilsuvísindi og KT-verkfrøði aftaná. Fyrimunurin er, at tey aftaná tíðina her longu eru fakliga stinn, áðrenn tey koma inn á hægru lærustovnarnar.

 

Hugnaligt lestrarumhvørvi

 

Lestrarumhvørvið á Tøknibreytini er sera gott.

 

– Vit eru partur av einum størri skúla, men vit eru ein lítil deild. So tað er nokkso hugnaligt á tann hátt. Næmingarnir koma hvørjum øðrum nógv við, og tað er eisini ein serlig nærvera millum næmingarnar og starvsfólkini. Øll koma at kennast væl, sigur Kjartan Gaard Sleire.

 

– Vit eru rættiliga glað fyri, at vit liggja í hjartanum av Klaksvík. Av tí sama er stutt til allar hentleikar. Ja, alt er beint uttan fyri hurðina hjá okkum, sigur hann.

 

Næmingaheimið er partur av skúlanum, og næmingar kunnu av tí sama møta upp í inniskóm, um teir vilja. Spadserar man í ein hálvan minutt, so er man í svimjihøllini.

 

Ein partur av at ganga her er nevniliga eisini, at man býr á skúlanum.

 

– Eingin ivi er um, at næmingarnir búnast nógv við at flyta heimanífra og royna at búgva á skúlanum. Man fær eina kenslu av at flyta út, uttan at flyta ordiligt. Man kann jú fara heim um vikuskiftini.

 

Vinaløg fyri lívið

 

Næmingar úr øllum Føroyum plaga at vera á tøknibreytini.

 

Eitt gjøgnumgangandi fyri øll árini er, at trivnaðurin er stak góður.

 

– Næmingarnir her skapa vinaløg fyri lívið, tað tori eg at pástanda. Eg síggi hvørt ár, at fyrrverandi næmingar møta upp til opið hús, og gamlir flokkar hittast aftur, sigur Kjartan Gaard Sleire.

 

Námsferðir, virkisvitjanir og smærri verkætlanir uttan fyri skúlan eru eisini ein partur av at ganga á Tøknibreytini.

 

##med2##

##med3##

##med4##

##med5##

##med6##

##med7##

##med8##

##med9##

##med10##

 

Haldarar kunnu lesa Sosialin á www.sos.fo

 

Lestrarblaðið kann lesast her: https://www.calameo.com/read/007198570ad00f862ba3f

 

Mest lisið

Kvinnur og menn um at slíta høvdið av hvør øðrum

Hesir eru úttiknir til fótbóltslandsliðið

Umfatandi bjargingararbeiði í Norðsjónum

Frádráttur fyri húsaleigu minkar niður í 50.000 krónur

Myndir: Móttøka í Tinganesi

Martin Steingrund – Eg lesi til skipara-aspirant á Vinnuháskúlanum, har eg nærum hvønn dag brúki fak og vitan, sum eg havi fingið frá HT-útbúgvingini í Klaksvík. Eg havi eisini havt ein fyrimun við at hava havt statik & styrkilæru á TSK, sum hevur nógv við stýrimansarbeiði at gera. HT-útbúgvingin hevur haraftrat givið mær møguleika at ferðast runt jørðina umborð á tangaskipum.

Maria Magnusdóttir – Eg lesi medisin í Aarhus, og eri akkurát byrjað upp á 5. semester. Tá ið eg valdi HT-útbúgvingina á TSK, visti eg, at eg vildi vera lækni. Tað var lætt at velja skúla, tí HT hevði øll tey neyðugu fakini. Process-fakið, evnafrøði og lívfrøði hava hjálpt mær væl, og eg havi kunnað brúkt vitanina á HT á universitetinum. Eg var glað fyri, at tað var ein lítil skúli, tí hetta gjørdi, at mann kendi bæði næmingar og lærarar væl, og tað var lætt at fáa hjálp og vegleiðing.

Tóra Mohr – HT-útbúgvingin hevur givið mær nógv gott við í skjáttuna sum lesandi. Eg lesi til lærara á Fróðskaparsetri Føroya. Hetta er fyrsta árið hjá mær, og dámar mær hetta rættuliga væl. Nógv av tí, sum eg lærdi á tøknibreytini, havi eg tikið við mær víðari. Á TSK hugsaðu vit kreativt og skaptu nýtt. At arbeiða við onkrum teoretiskum og síðani gera tað veruligt er mega kul og gevandi.

Oddvør Josephsen – Eg lesi til lærara, tí mær dámar væl at arbeiða við børnum. Í juni 2020 varð eg liðug á tøknibreytini á TSK. Tað vóru trý góð og gevandi ár, har skúli, leiðsla og lærarar vóru við til at skapa góðar, gevandi og mennandi karmar. Tøknibreytin gevur tær nærum fríar møguleikar, tá tú skalt undir hægri lesnað. Um tú ynskir trý góð, mennandi og spennandi ár, vil eg 100% viðmæla tær at velja tøknibreytina á TSK.

Olgar Fuglø – Á tøknibreytini í Klaksvík høvdu vit eina læruríka og stuttliga lærugrein, ið eitur Bygging og orka. Hetta birti mín áhuga fyri verkfrøði, og gjørdi tað møguligt hjá mær at taka eina hægri útbúgvingin á DTU Lyngby í Danmark. Her lesi eg “Byggeteknologi”, ið er ein sivilverkfrøðingaútbúgving í bygging.

Bjørt Jansdóttir – Eg búgvi í Keypmannahavn og lesi medisin á 6. semestri. Eg visti, áðrenn eg byrjaði á miðnámi, at eg ætlaði at lesa til lækna, og valdi tí at lesa á TSK - og tað havi eg verið sera glað fyri. Á TSK lærdu vit fyrst teoriina og brúktu síðani vitanina í praksis á royndarstovunum. Hetta hevur hjálpt mær nógv í mínum víðari lesnaði, tí at tann grundleggjandi vitanin hevur sett seg í minnið, og tí er tað lættari at skilja og læra nýggj hugtøk.

Sanný Langaard lesur til laborant í Holstebro & Anna Kristina Snorradóttir Jensen lesur sjúkrarøktarfrøði á Fróðskaparsetri Føroya. – HT-útbúgvingin hevur ment okkara vitan innan náttúruvísindi, gransking og kunnleika innan tøknifrøði. Hetta gagnar bæði yrkinum sum sjúkrarøktarfrøðilesandi og laboranti (rannsóknarhjálpari).”