Ísak Vedelsbøl, Óli Mittún og liðfelagarnir í Sävehof spældu í kvøld fjórðu fjórðingsfinaluna móti Karlskrona í endaspælinum í best svensku hondbóltsdeildini.
Á heimavølli í Partille eydnaðist tað Sävehof at vinna 33-30 á Karlskrona aftaná longda leiktíð. Tá vanligi leiktíðin var farin stóð á jøvnum 27-27. Í steðginum var Karlskrona á odda 16-15.
Sävehof vann sostatt fjórðingsfinaluuppgerðirnar 3-1, og skulu nú spæla hálvfinalur, har tað eisini verður spælt av fimm dystum.
Óli skoraði seks mál og legði upp til fýra mál. Ísak skoraði eitt mál.
Í hálvfinalunum fær Sävehof sína søk fyri. Teir møta grundspælsvinnarunum og meistaraskapsfavorittunum, Ystad.
Fyrsta hálvfinalan verður spæld í Ystad komandi hóskvøld klokkan 18.
