Undan seinasta umfarinum í SMS-deildini vóru kapprenningar um annað plássið, ið gevur beinleiðis atgongd til FM-hálvfinalurnar, og kapprenningin um sætta plássið, ið gevur rætt til eina FM-fjórðingsfinalu.
Tað gjørdist H71 sum vann annað plássið í grundspælinum. Hoyvíkskvinnur vunnu á útivølli 30-22 á Neistanum. Í fyrra hálvleiki leikaði meira javnt á. Í steðginum var H71 á odda við bert einum máli, 13-12.
Anna S. Mikkelsen var við seks málum toppskjútti hjá Neistanum. Lea S. L. Brockie var toppskjútti hjá H71, somuleiðis við seks málum.
Kyndil tryggjaði sær fult stigatal, 42 stig fyri 21 dystir við at vinna 30-28 á VÍF í høllini í Vestmanna. Í steðginum vóru kyndilskvinnur á odda 15-13.
Fríða Nolsøe Olsen var við níggju málum toppskjútti hjá VÍF. Toppskjútti hjá Kyndli við 10 málum var Bára Krossteig Hansen.
Suðuri í Vági vann Stjørnan 27-22 á VB. Í steðginum vóru klaksvíkskvinnur á odda 11-8.
Angela Sigga Birgisdóttir hjá VB og Tóra Eliasen hjá Stjørnuni vóru toppskjúttar, báðar við sjey málum.
Í høllini á Skála vann StÍF greiðan 26-17 sigur á EB. Tað lá serliga væl fyri hjá strandakvinnum í fyrra hálvleiki. Í steðginum var StÍF á odda 16-8.
Josefine Dyring var við níggju málum toppskjútti hjá StÍF. Karinbeth Leonsdóttir Kjærbæk og Talita Jeffrisdóttir vóru við fimm málum hvør toppskjúttar hjá EB.
Kyndil vann deildina við 42 stigum. Nummar tvey er H71 við 33 stigum. VÍF er nummar trý við 31 stigum, og Neistin er nummar fýra við 25 stigum. StÍF er nummar fimm við 16 stigum, og Stjørnan er nummar seks við 10 stigum. VÍF møtir Stjørnuni í aðrari fjórðingsfinaluni, og í hinari møtast Neistin og StÍF. EB endaði næstaftast við sjey stigum, og VB endaði aftast í deildini við fýra stigum.
HER ber til frá HSF at síggja allar dómaraseðlarnar uttan tann frá dystinum millum Neistan og H71, ið ikki er tøkur:
