Fiskiskapurin eftir svartkalva í Suðurgrønlandi er í einari positivari gongd, og í summar gjørdi grønlendska landsstýrið av at hækka kvotuna á 420 tons við 350 tonsum aftrat. Hetta er í umsitingarøkinum, Paamiut og Qaqortoq.
Endamálið við hækkingini er at tryggja, at útróðrarmenn kunnu fiska alt áirð og fyri at tryggja framleiðsluna á fiskavirkjunum í økinum.
Longu miðskeiðis í juli í ár var svartkalvakvotan hjá útróðrarmonnum á 420 tons næstan uppfiskað. Tá vóru bert 19 tons eftir at fiska - ella umleið 15 prosent av samlaðu kvotuni.
Tí gjørdi grønlenska landsstýrið av at veksa kvotuna av svartkalva við 350 tonsum, soleiðis at samlaða kvotan í umsitingarøkinum nú var á 770 tons.
Hóast hækkingin kom væl við hjá lokalu útróðrarmonnunum í Suðurgrønlandi, halda menn nú, at kvotan av svartkalva fyri árið eigur at verða munandi hægri.
Grønlendsk hagtøl siga, at nú eru 65 prosent av kvotuni á 770 tons fiskað, og tí er ivasamt um tey 271 tonsini, sum eru eftir fyri árið 2023, eru nóg mikið til, at veiðan hjá útróðrarmonnum kann halda fram alt árið.
##med2##
Ein av teimum, sum er í iva, er Ole Jørgen Davidsen, sum bæði er formaður fyri fiski-og veiðimannafelagið í Narsaq og stjórnarlimur í KNAPK, sum er grønlendska fiski-og veiðimannafelagið.
Hann letur væl at fiskiskapinum í Narsaq-økinum í summar og sigur, at tað saktans ber til at liva av at fiska svartkalva í Suðurgrønlandi, soleiðis sum veiðan hevur verið higartil í ár.
Skal fiskiskapurin hjá útróðrarmonnum eftir svartkalva mennast í Suðurgrønlandi, verður neyðugt at veksa um kvotuna.
- Vit vóna tískil, at landsstýrið vil leggja aftrat kvotuni á 770 tons einaferð enn, um tað vísir seg at gerast neyðugt, soleiðis at útróðrarmenn kunnu fiska alt árið, sigur Ole Jørgen Davidsen við Sermitsiaq.
