Fyrr í dag bórust tíðindini um, at íslendska samtakið, Hagar hf., ætlar at keypa allan partapeningin í P/F SMS, og tað hevur ávirkað partabrævakursin.
Hagar er nevniliga skrásett á íslendska partabrævakeypskálanum, og kursurin er harvið hækkaður upp í 88 íslendskar krónur, ið er ein hækking á 2,92 prosentstig. Hetta gevur fyritøkuni eitt marknaðarvirðið á 95 milliardir íslendskar krónur, sum svarar til 4,8 milliardir danskar krónur.
Hagar er eitt av størstu samtøkum í Íslandi, ið rekur ymsar handlar og fyritøkur í landinum. Kendastu virkini hjá teimum eru millum annað Bónus og Hagkaup. Umframt handilsvinnu hevur Hagar eisini virksemi innan brennievnissølu, matvørupakking og goymslu- og útbýtistænastu.
Felagið varð stovnað í 2003 og hevur yvir 2.500 starvsfólk.
##med2##
Partabrævakursurin á Hagar hf. seinastu fimm árini
Kursurin á partabrøvunum vísir eina stóra hækking seinastu árini. Virðið á partabrøvunum er vaksið umleið 30,4% seinasta árið, og tað er eisini vaksið meira enn 117% seinastu fimm árini.
Partabrøvini hava tó víst sveiggj við stutttíðarsveiggjum, sum ofta eyðkennir handilsvinnuna.
