Tað var á býráðsfundi í Eysturkommunu hin 26. mars í ár, at býráðið samtykti at taka av tilboði frá Kanjon viðvíkjandi út- og umbygging av skúlanum í Leirvík.
Sáttmálin millum Eysturkommunu og Kanjon varð undirskrivaður í gjár.
- Samlaða kostnaðarmetingin fyri verkætlanina er umleið 95 milliónir krónur. Arbeiðið fer í gongd skjótast gjørligt og væntast at vera liðugt innan hálvt triðja ár.
Hetta vita tey í Eysturkommunu at siga í dag.
Vit kunnu leggja aftrat, at verkætlanin í Leirvík fevnir um niðurtøku av trimum bygningum. Í teirra stað verður ein nýggjur bygningur reistur, og útiøkið rundan um verður tillagað.
Nýggi bygningurin verður umleið 2000 fermetrar.
Bygningurin verður karmur um skúlastovur, tónleikastovu, mið- og ítróttahøll við tveimum badmintonbanum, bókasavni, umklæðingarrúmum og læraraumhvørvi við fyrireikingarhølum.
##med2##
