Føroyski landsliðsmálverjin, Annika Fríðheim Petersen hevur spælt sín seinasta dyst fyri Nykøbing Falster Håndbold á hesum sinni.
Nykøbing Falster tapti í kvøld eisini seinna bronsudystin fyri Ikast-Herning. Í kvøld gjørdist talan um eitt 24-27 tap. Tað var serliga í fyrra hálvleiki tað gekk illa í hond. Í steðginum var Ikast-Herning á odda 17-11.
Ikast-Herning vann fyrra bronsudystin 33-31 (19-15), og tær vinna sostatt bronsudystirnar samanlagt 2-0.
Bæði Annika og dugnaligi kappingarneytin, Cecilie Greve høvdu báðar eitt bjargingarprosent upp á 30 prosent í kvøld.
Nykøbing Falster tapti eisini finaluna í European League fyri Ikast-Herning. Tá tapti Nykøbing Falster 24-31 (15-14).
Í steypakappingini tapti Nykøbing Falster dystin um triðja plássið 27-28 (11-17) fyri Silkeborg-Voel.
Nykøbing Falster var sostatt við í tveimum hálvfinalum og einari finalu í einum minniligum kappingarári.
Komandi kappingarár spælir Annika við Follo í bestu norsku hondbóltsdeildini.