Í minsta lagi 148 fólk hava latið lív í DR Congo í eini bátavanlukku orsakað av einum eldi á Kongoánni.
Hetta veit Sky News at siga.
Eldurin byrjaði, tá ein kvinna fór at gera mat umborð, men eldur kom í motorrikna træbátin, sum holvdist.
Fleiri lupu í vatnið í eini roynd at bjarga sær, men doyðu, tí tey dugdu ikki at svimja.
Guvernørurin í landslutinum Equateur, Jean-Paul Boketsu Bofili, sigur, at fleiri enn 500 fólk vóru umborð á bátinum, tá vanlukkan hendi týsdagin.
- Í løtuni eru fleiri enn 150 av teimum, sum yvirliva, rakt av bruna uttan at fáa humanitera hjálp, sigur guvernørurin sambært Sky News.
Umleið 100 fólk hava fingið innivist á ráðhúsinum á staðnum, meðan onnur eru flutt á nærliggjandi sjúkrahús.
Hundraðtals fólk eru meldað saknað, eftir at myndugleikarnir hava fingið betri yvirlit.
Frammanundan varð mett, at stívliga 50 fólk høvdu latið lív.
Bátsvanlukkan hendi í útnyrðingspartinum av DR Kongo. Báturin var farin úr havnini í Matankumu á veg móti Bolomba-økinum, tá eldurin kyknaði nærhendis býnum Mbandaka.
Bátsvanlukkur henda javnan í DR Kongo, har gamlir træbátar eru ein týðandi flutningsháttur millum bygdir fram við Kongoánni, skrivar Reuters. Ofta eru bátarnir lastaðir langt út um kapasitetin.
Í 2024 druknaðu fleiri enn 78 fólk, tá ein bátur við 278 ferðafólkum kollsigldi í ánni Kivu.
Í aðrari vanlukku í desember sama ár doyðu í minsta lagi 22 fólk, tá ein bátur sakk í vestara parti av landinum.
/Ritzau/
