Ísraelski forsetin, Isaac Herzog, heitir nú á stjórnina um alt fyri eitt at steðga arbeiðinum við eini umstríddari rættarnýskipan.
– Við atliti til samanhaldið millum ísraelska fólkið og við atliti til ábyrgd heiti eg á tykkum um at steðga lógartilgongdini alt fyri eitt, skrivar hann á Twitter.
Forsetin hevur bara symbolskan leiklut í Ísrael.
Áheitanin frá Herzog kemur, dagin eftir at Benjamin Netanyahu, forsætisráðharri, koyrdi verjumálaráðharran frá, tí hann var ímóti nýskipanini. Tað førdi til hópmótmæli kring alt landið.
Í síðstu viku kom Isaac Herzog við einum semingsuppskoti. Tí vísti stjórnin tó aftur.
Fleiri ísraelskir miðlar, teirra millum Jerusalem Post og Haaretz, skrivaðu fyrr í morgun, at ísraelska stjórnin eftir øllum at døma tosar um at steðga á við umstríddu rættarnýskipanini.
Tað hendir, eftir at tíggjutúsundtals mótmælisfólk í gjárkvøldið vóru komin saman í Tel Aviv og fleiri øðrum býum fyri at vísa sína vreiði ímóti, at Netanyahu hevði koyrt verjumálaráðharran, Yoav Gallant, frá.
Uppsøgnin av honum kom, eftir at Gallant hevði heitt á stjórnina um at steðga nýskipanini.
Orsakað av hesum kallaði Netanyahu stjórnina saman til skundfund.
Sambært Jerusalem Post hildu tingingarnar fram, sum byrjaðu í gjárkvøldið, líka til klokkan fimm í morgun.
Umframt lógmálaráðharran Yariv Levin og fíggjarmálaráðharran Bezalel Smotrich úr ytsta høgraveingi vóru eisini Ron Dermer, ráðharri fyri strategiskum málum, og Yoav Kisch, útbúgvingarmálaráðharri, á fundinum, sum varð hildin í forsætisráðharraskrivstovuni, verður sagt.
Hundraðtúsundtals ísraelar hava síðani januar mótmælt ætlanunum hjá Netanyahu.
Nýskipanin fer at skerja heimildirnar hjá hægstarætti og gera tað møguligt við einum vanligum meiriluta í tjóðartinginum at broyta avgerðir hjá hægstarætti.
Mótmælisfólkini siga, at nýskipanin fer at broyta Ísrael til eitt einaræði.
/ritzau/Reuters
##med2##
##med3##
##med4##
##med5##
##med6##
##med7##
##med8##
##med9##
##med10##
##med11##
##med12##