Í løtuni er eitt ísfiskalínuskip til fiskiskap. Skipið fær mest av hýsu og toski og kemur møguliga inn at landa síðst í næstu viku.
- Helst fer okkurt annað ísfiskalínuskip avstað, nú veðurforsøgnin er heldur frægari, siga tey á Fiskamarknaði Føroya í dag.
Umframt tað eina ísfiskalínuskipið, sum er til fiskiskap, eru eisini fýra frystilínuskip úti - tvey í føroyskum sjógvi og tvey í íslendskum.
- Frystilínuskipini fáa eina blanding av toski, hýsu, longu, brosmu og so nakað av øðrum fiskasløgum.
Á Fiskamarknaði Føroya vænta tey, at fleiri frystilínuskip fara at loysa teir næstu dagarnar.
Um útlitini til útróður verður sagt, at streymurin verður brúkiligur í næstu viku, men veðrið verður umskiftandi við lágætt.
So, helst verður nakað av útróðri norðanfyri.
- Útróðrarbátarnir fáa mest av hýsu og so nakað av toski, og teir hava brúkiligan fiskiskap, verður lagt aftrat.
