Miðsinnaði borgarstjórin í Bukarest, Nicusor Dan, er á odda á forsetavalinum í Rumenia, vísir ein exit-kanning.
Hetta skrivar Reuters, eftir at valhølini í landinum hava stongt.
Sambært veljarakanningini fekk Dan meira enn 54 prosent av atkvøðunum, meðan mótstøðumaðurin úr høgravonginum, George Simion, fekk góð 45 prosent, skrivar AFP.
Men høgravenda forsetavalevnið í Rumenia, George Simion, vrakaði skjótt úrslitið av veljarakanningini.
Simion sigur, sambært Reuters, at hansara sigur er greiður og at hansara metingar vísa, at hann hevur umleið 400.000 fleiri atkvøður enn mótstøðumaðurin.
- Eg eri tann nýggi forsetin, skrivar høgravenda valevnið í einum uppslagi á X við síðuna av einum emoji av rumenska flagginum.
Simion var valevnið, sum stóð seg best í fyrsta umfari av forsetavalinum, og tí lýsa fleiri miðlar leiðsluna hjá Dan sum eitt stórt yvirraskilsi.
Eitt sindur meira enn ein tíma eftir, at valstøðini í landinum stongdu, eru 80 prosent av atkvøðunum taldar upp. Her stendur Nicusor Dan eisini á odda.
Óhefta valevnið Nicusor Dan er talsmaður fyri ES og NATO, og hann hevur sagt, at stuðulin frá Rumenia til Ukraina er avgerandi fyri trygdina í landinum mótvegis vaksandi hóttanini frá Russlandi.
Nicusor Dan hevur eisini ført valstríð við einum lyfti um at berjast ímóti "korruptu" og "arrogantu" politisku elituni.
Borgarstjórin stríðist ímóti George Simion í valstríðnum.
Simion er ímóti hernaðarhjálp til grannalandið Ukraina, og hann er atfinningarsamur mótvegis leiðsluni í ES.
Hann er eisini stuðul hjá amerikanska forsetanum Donald Trump og hevur ført valstríð við íblástri frá Donald Trump við slagorðinum "Ger Rumenia stórt aftur".
/Ritzau/
