Fleiri lond í oljufelagsskapinum Opec+ økja um framleiðsluna.
Serliga fara tey at økja oljuframleiðsluna við 548.000 tunnum um dagin í august.
Hetta varð avgjørt á virtuellum fundi leygardagin. Tað boðar Opec frá í tíðindaskrivi.
Opec+ er ein felagsskapur hjá Oljuútflutningslondunum (Opec) og teirra sameindu, undir leiðslu av Russlandi.
Økta framleiðslan kemur frá átta av limunum í oljufelagsskapinum: Saudi Arabia, Russlandi, Kuwait, Oman, Irak, Kasakstan, Algeria og Sameindu Arabisku Emiratunum (UAE).
Opec+ stendur fyri umleið helvtini av heimsins oljuframleiðslu. Síðan 2022 hava londini skert framleiðsluna fyri at stuðla oljuprísinum.
Men í ár hevur stovnurin broytt kós fyri at fáa marknaðarpart aftur. Harumframt hevur amerikanski forsetin, Donald Trump, kravt, at OPEC+ skal økja um framleiðsluna sum liður í at halda bensinprísin á einum lægri støði, skrivar Reuters.
Tær 548.000 tunnurnar er eitt lop frá undanfarnu mánaðum. Í apríl var vøksturin 138.000 tunnur um dagin, meðan fyri mai, juni og juli hevði verið avtalað at hækka framleiðsluna við 411.000 tunnum um dagin.
Við hækkingini í august fer OPEC+ at hava latið út 1,918 milliónir tunnur av olju um dagin síðani apríl.
/Ritzau/
