Portugal er víðari til fjórðingsfinaluna í EM eftir brotssparkskapping móti Slovenia.
Einki mál varð skorað í vanligari tíð ella yvirtíðini, so eftir 120 málleysar minuttir mátti tað avgerast í brotssparkskapping.
Stóra hetjan var málverjin hjá Portugal, Diogo Costa, sum bjargaði trimum brotsspørkum og sendi liðið víðari í kappingina.
Áðrenn dramatikkin snúði tað mesta um, at 39 ára gamli Cristiano Ronaldo jagstraði eitt mál, sum skal gera hann til elsta málskjútta í EM. Tann strembanin gjørdist meira og meira desperat, so hvørt sum bardagin gekk.
Í fyrra hálvleiki fekk Ronaldo bóltin í eina góða støðu, men møguleikin glapp honum av hondum.
Tíggju minuttir eftir steðgin hamraði Ronaldo bóltin beint á Jan Oblak í slovenska málinum.
Harumframt sveimaði Ronaldo eftir bóltinum í luftini uttan at raka hann, og frustratiónirnar lýstu úr veteraninum.
Stutt fyri hálvleiksbríkslið ar miðvallarin João Palhinha um at skora við langskoti, men bólturin streifaði stongina og útum.
Slovenia stóð væl í verjuni og leitaði eftir mótálopum. Men slovenar gjørdust sjáldan álvarsliga hættisligir.
Í seinna hálvleiki hevði slovenski áleyparin, Benjamin Sesko, ein renniduel móti 41 ára gamla Pepe, men tað endaði í ongum.
Gott nokk fekk Sesko skot á, men bólturin rullaði út til málspark.
Pepe hevur sum heild spælt væl til EM í verjuni og tað var ringt at síggja, at hann var elsti leikarin á vøllinum.
Í 89.minutti hevði Ronaldo eitt stikling, men skotið var beint á Oblak, sum spældi ein framúr dyst.
Einki mál varð skorað í vanliga dystinum, og tí var umdystur.
Her fingu Portugal og Ronaldo ein gyltan møguleika.
Innskifti Diogo Jota driblaði inn í brotsteign og fall til jarðar millum fleiri slovenar. Tað varð mett sum brotsspark.
Ronaldo fekk ábyrgdina frá blettinum, men varð steðgaður av Oblak, sum jústaði bóltin á stongina og útum.
Ein tárandi Ronaldo varð troystaður av liðfeløgum áðrenn seinasta korterið skuldi spælast.
Her gjørdi Pepe eitt av sínum sjáldsomu mistøkum, tá hann misti bóltin í egnari hálvu og gav Sesko frírenning.
Portugisiski málverjin Diogo Costa, sum ikki hevði havt nógv at gera, diskaði tó upp við eini týðandi fótparadu.
So varð komið til brotssparkskappingina, og tað gekk skjótt fyri seg.
Josip Ilicic, Jure Balkovic og Benjamin Verbic brendu trý tey fyrstu sparkini hjá Slovenia. Allar tríggjar ferðirnar bjargaði Diogo Costa royndunum.
Ronaldo fekk møguleikan aftur og skoraði. Og tá Bruno Fernandes og Bernardo Silva eisini skoraðu, vann Portugal dystin.
Nú bíðar Frakland eftir Portugal í fjórðingsfinaluni fríggjakvøldið.
/ritzau/
