Tveir føroyskir landsliðsleikarar vóru í leiki í donsku steypakappingini í hondbólti hjá kvinnum í dag. Talan var um áttandapartsfinalur.
Landsliðsmálverjin, Rakul S. Wardum og liðfelagarnir í Ringkøbing taptu á heimavølli 29-34 fyri toppliðnum, Odense. Í steðginum var Odense á odda 16-14,
Rakul bjargaði níggju av 38 málroyndum, harímillum eitt brotskast.
Landsliðsleikarin, Pernille Brandenborg skoraði fimm mál, tá hon og liðfelagarnir í Keypmannahavn á útivølli vunnu stórsigur 40-17 á JAI Aarhus úr triðbestu deildini. Í steðginum var Keypmannahavn á odda 21-6.
Í komandi viku skulu liðini spæla fyrstu dystirnar í bestu deildini hetta kappingarárið. Ringkøbing hevur mikukvøldið klokkan 18 heimadyst móti Nykøbing Falster. Keypmannahavn hevur heimadyst móti liðnum hjá Mariu P. Nólsoy, Horsens komandi leygardag klokkan 14.
