Seks dagar síðani seinastu smittuna

Nú eru seks dagar síðani, at nakar fekk staðfest koronu í Føroyum

Eingin nýggjur smittutilburður varð staðfestur í gjár. Tað vísa nýggjastu tølini hjá Landslæknanum. Ikki síðani seinasta mánadag er nakar staðfestur smittaður í Føroyum. Tá vóru tveir nýggir tilburðir.

Í gjár vórðu 168 kanningar gjørdar, og allar kanningarnar eru liðugt greinaðar. Í alt eru 221.923 kanningar gjørdar.

Tilsamans hava nú 654 persónar fingið staðfest smittuna í Føroyum. Í alt eru 648 persónar staðfestir frískir aftur. Higartil er ein persónur deyður við koronu í Føroyum. Sostatt eru fimm persónar smittaðir í løtuni.

Ein persónur er í løtuni innlagdur á Sjúkrahúsverki Føroya í sambandi við koronusmittu.