Hernaðarliga stríðiði millum Tailand og Kambodja á markinum millum londini kann økjast til eitt veruligt kríggj.
Tað segði virkandi forsætisráðharrin í Tailandi, Phumtham Wechayachai, við tíðindafólk í morgun.
Higartil hava tung vápn verið við í bardøgunum, sigur hann. Tað varð ikki tilskilað nærri.
Síðani samanbrestirnir tóku seg upp hósdagin, hava londini bæði ákært hvørt annað fyri at hava lopið á fyrst. Í gjár stongdi Tailand øll landamørk til Kambodja orsakað av bardøgunum.
Fyrr mikudagin fordømdi herurin í Tailandi, at Kambodja brúkar langtrøkkandi vápn til at raka sivil øki.
Landið ákærdi eisini Kambodja fyri at hava framt tað, sum tað lýsti sum barbariskar gerðir, sum "vitleyst hava kravt lívið av fleiri ósekum sivilfólkum og sært tey".
Heilsumálaráðið í Tailandi upplýsir, at 15 tailendingar hava latið lív í samanbrestunum.
138.000 sivil fólk vóru eisini flutt burtur úr marknaøkjum millum londini, siga myndugleikarnir sambært tíðindastovuni AFP.
Ein kambodjanskur landminumyndugleiki hevur ákært tailendska herin fyri at hava brúkt eitt stórt tal av klyngubumbum. Hann vísti eisini á, at hann var ørkymlaður av tí, sum hann lýsti sum eitt álvarsligt brot á menniskjaligar reglur.
Myndugleikin vísti til eina hernaðarliga frágreiðing, sum tíðliga fríggjadagin eftir øllum at døma vísti, at eitt stórt tal av klyngubumbum vórðu brúktar tvær ferðir innan 90 minuttir í Preah Vihear-landslutinum við markið til Tailand.
Uttanríkisráðið í Tailandi svaraði ikki ákæruni.
Tailand og Kambodja hava stríðst fyri ræði yvir 817 kilometra langa markinum í meira enn 100 ár. Ósemjan snýr seg í høvuðsheitum um ræði yvir tempul í marknaøkjunum.
Seinastu mánaðirnar hevur stemningurin millum londini verið spentur, tí herarnir hjá londunum báðum hava mobiliserað seg á markinum.
Tann 28. mai varð ein kambodjanskur hermaður dripin, og tann 16. juli vórðu tríggir tailendskir hermenn særdir, eftir at landminur sprongdust.
Hósdagin elvdi hetta til skotskifti, og bardagarnir hava verið í bíðistøðu.
Fríggjamorgunin segði talsmaðurin hjá tailendska uttanríkisráðnum, Nikorndej Balankura, at landið er til reiðar at loysa ósemjuna gjøgnum diplomatiskar rásir, um Kambodja eisini vil hava tað.
Talsmaðurin vísir á Malaysia sum ein møguligan miðlara millum londini.
Ritzau/Reuters
