Dennis Holm, landsstýrismaður í fiskivinnumálum, hevur sent uppskot til kunngerð um tíðaravmarkaða serskipan fyri veiði eftir botnfiski á Føroyabanka í 2023 til hoyringar.
Eftir uppskotinum sleppa línuskip og útróðrarbátar aftur at royna á Føroyabanka í 2023.
Skipanin í 2023 er tó broytt samanborið við 2022. Býtið av fiskidøgum millum bólkar er øðrvísi enn í 2022.
- Útróðrarbátarnir fáa lutfalsliga fleiri dagar, enn teir høvdu í fjør, og línuskip lutfalsliga færri dagar. Ásett verður, at línuskip bert kunnu royna á Føroyabanka eftir hálvan august.
Í Fiskimálaráðnum vísa tey á, at skipanin fyri útróðrarbátarnar undir 15 tons í bólki 5 er eisini broytt.
- Í ár verður atgongdin avmarkað, so tað eru teir vinnuliga virknastu bátarnir, ið sleppa á Bankan.
Sagt verður, at fyri at fáa loyvi til veiði á Føroyabanka skal báturin hava avreitt fyri 500.000 krónur ella meira í minsta eitt av seinastu trimum árunum.
- Bátar, ið lúka hesa treyt og sum ætla sær á Føroyabanka í 2023, skulu innan ásetta freist søkja Vørn um fiskiloyvi.
Í fjør fiskaðu útróðrarbátar undir 15 tons av felags fiskidøgum uttan avmarkingar. Hetta verður nú broytt soleiðis, at eitt hámark verður sett fyri hvønn bátin.
- Sum nakað nýtt verður ásett, at øll veiða av Føroyabanka skal seljast um góðkenda uppboðssølu í Føroyum. Hetta verður gjørt fyri, at veiddur fiskur skal vera atkomiligur fyri fiskavirkini í Føroyum.
Eftir uppskotinum til kunngerð eru samanlagt 330 fiskidagar tøkir á Føroyabanka í 2023. Hetta er meira enn teir 200 dagarnir, sum Havstovan mælir til.
Í Fiskimálaráðnum meta tey kortini ikki, at hetta ger, at veiðitrýstið á Bankanum verður samsvarandi størri - ella, at gingið verður stovninum á Føroyabanka ov nær.
- Ein orsøk er, at í ár verða lutfalsliga fleiri dagar latnir útróðrarbátum. Hesir bátar draga vanliga ikki líka nógvar húkar hvønn fiskidag, sum línuskipini gera. Ein fiskidagur hjá einum útróðrarbáti er tí ikki líka effektivur sum ein dagur hjá einum línuskipi.
Harafturat telur sigling út og inn av Bankanum við, tá dagabrúkið hjá línuskipum og størru útróðrarbátunum verður gjørt upp. Hjá bátum undir 15 tons telur hvør túrur ein fiskidag.
Um heimasíðuna - www.fisk.fo - kann uppskotið til kunngerð um tíðaravmarkaða serskipan fyri veiði eftir botnfiski á Føroyabanka í 2023 lesast.
