Aftaná heilar 19 sigrar á rað vóru føroyski málverjin, Margit Weihe Fríðmundsdóttir og liðfelagar hennara í EH Aalborg fyri einum tapi í næstbestu donsku hondbóltsdeildini.
EH Aalborg spældi oddauppgerð móti Bjerringbro á útivølli.
EH Aalborg var á odda 14-13 í steðginum, men haltaði aftaná í seinna hálvleiki, og tapti at enda dystin 28-31.
EH Aalborg og Bjerringbro eru jøvn í stigum, tey hava 38 stig hvør. Men Bjerringbro er betri innanhýsis.
Bjerringbro hevur tí fyrimunin undan seinasta umfarinum.
Skulu Margit og liðfelagarnir vinna deildina, og harvið flyta beinleiðis upp í deildina mugu tær fyrst og fremst vinna á botnproppinum, HIK á heimavølli komandi leygardag. Samstundis má Bjerringbro seta stig til á útivølli móti Holstebro.
Magna Tórðardóttir og liðfelagarnir í HIK taptu í dag á heimavølli 29-32 (13-17) fyri DHG. Magna skoraði tvey mál fyri HIK í dag.
HIK er aftast í deildini við átta stigum, og tær flyta niður í triðbestu deildina.
