Fleiri ókendir gerningsmenn hava lopið á ein bil við tveimum atkvøðukassa í iranska landslutinum Sistan og Baluchistan.
Tað skriva iranskir almennir miðlar í nátt leygardagin.
Gerningsmenninir drupu tveir limir í iransku trygdarliðunum í álopinum.
Ógreitt er, hvat hendi við atkvøðukassunum og hvat motivið var fyri álopinum.
Iranska fólkið fór fríggjadagin á val fyri at velja nýggjan forseta, eftir at Ebrahim Raisi doyði í mai í einum tyrluvanlukku.
Valið er millum fýra valevni - øll trúføst móti Ayatollah Ali Khamenei, ovasta leiðaranum í Iran.
Tá 10,3 milliónir atkvøður vóru taldar, boðaði iranska almenna sjónvarpið tíðliga leygarmorgunin frá, at loyalisturin Saeed Jalili hevði lagt seg á odda fram um hóvliga Masoud Pezeshkian, sambært innanríkisráðnum.
Pezeshkian er limur í iranska parlamentinum og umboðar býin Tabriz. Hann er tann einasti við stuðli frá iransku nýskipanarleguni, sum hevur fingið loyvi at stilla upp. Øll hini eru konservativ.
Umleið 61 milliónir iranar hava valrætt.
Dulnevndar keldur siga við tíðindastovuna Reuters, at valluttøkan á umleið 40 prosent var lægri enn væntað. Talið er ikki alment váttað.
Hevði tað ikki verið fyri deyða Raisi, hevði ikki verið forsetaval fyrr enn í 2025.
Endaliga úrslitið verður væntandi klárt innan tveir dagar tí at atkvøðurnar verða taldar manuelt.
Um einki valevni fær meira enn 50 prosent av atkvøðunum, er 2. umfar millum tey bæði valevnini við flest atkvøðum.
Í roynd og veru stýrir forsetin dagliga politikkinum í Iran, meðan átrúnaðarligi leiðarin í Iran, Ayatollah Ali Khamenei, hevur seinasta orðið. Khamenei er eisini yvirleiðari í herinum í landinum.
Roknað verður ikki við, at valið fer at hava við sær stórar politiskar broytingar. Afturfyri kann tað hava ávirkan á, hvør kemur við eftir 85 ára gamla Khamenei, sum hevur sitið við valdið í yvir trý áratíggju.
/ritzau/Reuters
