Týska ákæruvaldið hevur ákært fýra menn, sum ákærumyndugleikin heldur eru limir í Hamas, ið Týskland metir sum ein ólógligan yvirgangsfelagsskap.
Tríggir av monnunum vórðu handtiknir í Berlin í desember í fjør, og hin fjórði varð handtikin í Rotterdam í Niðurlondum og útflýggjaður Týsklandi.
Allir fýra hava sitið varðhaldsfongslaðir og skulu sambært ákæruni hava havt "týdningarmiklar støður í felagsskapinum og beinleiðis samband við leiðarar í vápnaða partinum av Hamas".
Sambært ákæruni hava teir fýra verið við til at skipað vápnagoymslur fyri Hamas í fleiri evropeiskum londum - helst, sum liður í einari tilrættalegging av álopum á jødiskar stovnar og onnur mál.
Hetta veit tíðindastovan NTB at siga í kvøld.
