Í góðveðrinum í morgun varð ein grind funnin á Gøtuvág.
Grindin varð rikin inn á Syðrugøtu, og hon hevur lagt beinini.
– Tað gekk øgiliga skjótt og væl. Hvalirnir verða í løtuni sleipaðir til kaiina í Noðragøtu, har teir skulu merkjast. Tá tað er liðugt, fara vit at býta grindina. Eg gangi út frá, at tað verður til dráps- og rakstrarpartar, sigur Jacob Vestergaard, sýslumaður.
– Tað var sperrað av á sandinum, og somuleiðis verður sperrað av á kaiini, so óviðkomandi ikki sleppa at blanda seg upp í, sigur hann.
Men vit á in.fo vita tó, at umboð fyri Sea Shepherd hava verið inni á økinum. Tað skriva tey á Facebook í dag.
Dagføring kl 13: Har vóru upp móti 100 hval.