Sambært einum høgum amerikanskum embætismanni hava Ísrael og Libanon gjørt eina avtalu um treytirnar fyri vápnahvíld í stríðnum millum Ísrael og Hizbollah.
Hetta skrivar netmiðilin Axios.
- Vit halda, at vit hava eina avtalu. Vit eru á málstrikuni, men vit eru ikki farin um hana enn, sigur keldan við Axios.
- Ísraelska stjórnin skal góðkenna avtaluna í morgin, og okkurt kann altíð ganga galið fyri ta tíð.
Hvørki Ísrael, Libanon ella Hizbollah-rørslan hava alment boðað frá, um ein avtala er komin uppá pláss.
Men fundur í trygdarráðnum hjá ísraelsku stjórnini er lýstur til týsdagin.
Sambært tíðindastovuni Reuters sigur sendiharrin hjá Ísrael í USA, at semja má fáast í lag innan fáar dagar.
Fyrr mánadagin boðaði ísraelska stjórnin frá, at partarnir eru á veg móti vápnahvíld, men at enn eru ógreidd mál.
Uttanríkisráðharrin í landinum, Gideon Saar, sigur, at ein avtala um vápnahvíld verður treytað av, at tvær týðandi treytir verða hildnar.
- Tann fyrra er, at Hizbollah verður forðað í at flyta seg suður um ánna Litani, og tað seinna er, at Hizbollah er forðað í at endurbyggja sína styrki og endurbrynja seg um alt Libanon, sigur Saar.
Í síðstu viku boðaði amerikanski sendiharrin í økinum, Amos Hochstein, frá munandi framgongd.
Keldur í Libanon vístu mánadagin varligt bjartskygni, men søgdu seg ikki hava álit á ísraelska forsætisráðharranum, Benjamin Netanyahu.
- Pílurin peikar ímóti eini avtalu, men bert í lítlan mun, tí einum persóni sum Netanyahu kanst tú ikki hava álit á, sigur næstformaðurin í parlamentinum í Libanon, Elias Bou Saab.
Ritzau/Reuters
