Sambært ákæruvaldinum breyt maðurin inn í garasjuna hjá órættaða og krógvaði seg. Tá órættaði fór í garasjuna eftir einum tummastokki, leyp ein maður á hann.
Órættaði bleiv sligin í høgra eygað. Álopsmaðurin hevði knív á lofti og ætlaði at stinga mannin. Tað eydnaðist órættaða at skumpa álopsmannin um koll og renna burtur.
Órættaði maðurin rann til grannan og fór síðani heima aftur. Tá sá hann, at álopsmaðurin royndi at bróta inn til beiggja órættaða og unnustuna, sum er fyrrverandi unnusta skuldsetta.
Tað eydnaðist ikki at bróta inn, og álopsmaðurin hvarv í myrkrinum.
Fyrrverandi unnustan hjá skuldsetta hoyrdi róp, og tá hon hugdi út, sá hon ein mann renna burtur. Síðani sá hon fyrrverandi unnustan, og hon var ikki í iva um, at hann ætlaði sær inn.
Tað eydnaðist henni at stongja hurðina í síðstu løtu.
Seinni bleiv skuldsetti handtikin.
