Týski javnaðarflokkurin SPD og konservativi CDU/CSU avdúka í dag ætlanirnar hjá nýggju týsku stjórnini.
Millum annað eru tey samd um at vísa aftur friðskjólsøkjarar við markið í samstarvi við grannalondini og seta hert eftirlit við markið í gildi.
Tað segði komandi kanslarin, Friedrich Merz úr CDU, á tíðindafundi, har nýggja stjórnarsamgongan varð kunngjørd. Tað upplýsir tíðindastovan Reuters.
Merz lovar at gera enda á óregluligari fólkaflyting til Týsklands, stendur í fráboðanini.
Í samráðingunum um nýggja stjórn vildi CDU herða tilflytarapolitikkin, eitt nú hert marknaeftirlit og beinleiðis avvísing av tilflytarum við markið.
SPD hevur annars talað ímóti hesum.
Seinnapartin lovaði Friedrich Merz eitt "heimflytingaroffensiv" móti teimum, sum eru í Týsklandi ólógliga.
Miðskeiðis í september í fjør setti Týskland í gildi eftirlit við markinum til øll grannalondini, eisini Danmark.
Tað skuldi verja móti "akuttum vanda frá islamistiskum yvirgangi og álvarsligum brotsverkum tvørtur um landamørk".
Hon varð longd við hálvum ári síðst í februar í ár.
Merz hevur áður lovað, at hann á odda fyri nýggjari stjórn fer at økja um íløgurnar hjá Týsklandi í verjuna. Hann fer eisini at stuðla týskum fyritøkum, sum eru avbjóðaðar av høgum kostnaði og fallandi eftirspurningi.
Harumframt hevur Merz sett sær fyri at reka ein strangari tilflytarapolitikk enn hansara konservativi forseti sum kanslari Angela Merkel.
Samgongan fer eisini at kanna eina møguliga endurvirkning av fleiri kjarnorkuverkum.
Nýggja stjórnin hevur serliga fokus á at styrkja búskapin, verður sagt.
Tey fara millum annað at lækka el-avgjaldið, avtaka eina umstrídda hitalóg og seta aftur skattalættar fyri diesel í landbúnaðinum, skrivar Reuters og vísir til avtalutekstin.
Evropa "kann rokna við okkum", segði Merz á tíðindafundinum.
- Komandi samgongan fer at reformera og gera íløgur í at gera Týskland støðugt, gera tað trygt og styrkja tað búskaparliga aftur, sigur Merz.
Síðan valið í februar hava flokkarnir havt úr at gera við at semjast um stjórn.
Hangandi yvir høvdinum á týskarum og evropearum óttin fyri einum alheims handilskríggi, stúran fyri amerikanskum stuðli til Evropa undir Donald Trump forseta, og framhaldandi kríggið í Ukraina.
Friedrich Merz varð á tíðindafundinum spurdur, um hann hevði ein boðskap til Trump.
Síðani skifti Merz til enskt. Hann svaraði, at Týskland fer at halda sínar verjuskyldur og umbyggja kappingarførið.
- Týskland er komið á rætta kós aftur, segði hann.
Merz væntar, at nýggja stjórnin tekur við fyrst í mai. Men flokkarnir skulu fyrst atkvøða fyri avtalutekstinum.
Harumframt skal ein meiriluti í Samveldistinginum atkvøða fyri at flyta kanslarasessin. Tað verður frá Olaf Scholz hjá SPD, sum avloysti Angelu Merkel í 2021, til Friedrich Merz.
/Ritzau/
